5 myńnan astam qaraǵandylyq latyn qarpimen dıktant jazdy

QARAǴANDY. QazAqparat – Qaraǵandy oblysynda latyn qarpindegi jalpyhalyqtyq dıktantqa 5 myńnan astam adam qatysty, dep habarlaıdy QazAqparat aımaq ákimdigine silteme jasap.

Eske salsaq, búgin elimizde latyn grafıkasy negizinde jalpyqazaqstandyq ashyq dıktant ótti. Bıyl Qazaqstan halqy Assambleıasynyń jobasy Jastar jylyna arnalyp, dıktanttyń taqyryby «2019 jyl – Jastar jyly» ataldy.

Dıktant el aımaqtarynda birmezgilde, saǵat 11.00-de bastaldy.

Qaraǵandy oblysynda jalpy respýblıkalyq aktsııaǵa 5 myńnan astam adam – stýdentter, oqytýshylar, memlekettik qyzmetkerler, etnomádenı birlestikterdiń ókilderi qoldaý kórsetti. Qatysýshylar Qaraǵandy qalasynyń Dostyq úıinde, oqý oryndarynda, aımaqtyq kitaphanalarda jınaldy.
«Dıktant jazý qıyn emes. Dostyq úıiniń lıngafondyq kabınetinde qazaq tilin oqımyn. Bul jobaǵa ekinshi ret qatysyp otyrmyn. Aqparattyq tehnologııalar ǵasyrynda ýaqyt óte kele alǵa jyljýymyz kerek. Latyn álipbıine kóshý – ýaqyt talaby. Bul qazaqstandyq qoǵamnyń rýhanı jańǵyrýyna, memlekettik tildiń mártebesin kóterýge jáne onyń bolashaǵyn qamtamasyz etýge múmkindik beredi», - dep atap ótti oblystyq ýkraınalyq T. Shevchenko atyndaǵy «Ridne slovo» ortalyǵynyń tóraıymy Zenovııa Krasıvskaıa.
Jobanyń maqsaty – jalpyulttyq birlik pen kelisimdi nyǵaıtý, qazaqstandyq biregeılikti qalyptastyrýǵa járdemdesý, halyq pen qoǵamdy biriktiretin faktor retinde memlekettik tildi úırenýge yntany arttyrý.

Aıta keteıik, dıktantty mamandar tekseredi. Úzdik qatysýshylar QHA-nyń alǵys hattaryna ıe bolady.