5 myń tólem termınalynyń qojaıyndary Beeline uıaly baılanys operatorynyń esep-shotyn tolyqtyrý qyzmetin kórsetýden bas tartpaq
ALMATY. 11 maýsym. QazAqparat - Qazaqstanda 8 myńnan astam tólem termınaldary bar. Endi onyń 5 myńynyń qojaıyndary 16 maýsymnan bastap Beeline uıaly baılanys operatorynyń esep-shotyn tolyqtyrý qyzmetin kórsetýden bas tartpaq.
Bul jaıly búgin Almatyda ótkizilgen baspasóz máslıhatynda málim boldy.
«QIWI tólem júıesi basshylyǵynan Beeline Qazaqstan kompanııasynyń 16 maýsymnan bastap Birlesken jedel tólemder júıesi (OSMP) kompanııasyna tólenetin syıaqy mólsherin edáýir qysqartatyny týraly habarlama kelip tústi. Bul termınal qojaıyndaryna tólemderdi jınaǵany úshin aqy tólenbeıdi degen sóz. Al, qosymsha shyǵyn termınal ıeleri men Beeline abonentteriniń moınyna túsedi», - deıdi «Ýnıkým Qazaqstan» kompanııasynyń bas dırektory Beıbit Asanbaev. Onyń aıtýynsha, bul is júzinde baılanys operatory abonentterinen alynatyn komıssııa mólsheri shamamen 2 paıyz qymbattaıdy degendi bildiredi. Mysaly, buryn 1000 teńge tólegen kezde 50 teńge kóleminde standartty komıssııa alynyp kelgen bolsa, 16 maýsymynan bastap ol orta eseppen 70 teńgege deıin kóbeımek. Sondyqtan olar operatordyń aı saıynǵy syıaqyny 3 paıyzdan 0,5 paıyzǵa deıin tómendetý týraly sheshimine osylaısha narazylyq bildirýge bel býǵan.
