5 myń dollar úshin aǵasyn óltirgen azamat ustady
ALMATY. 31 tamyz. QazAqparat /Ádilet Musahaev/ - Ońtústik Qazaqstan oblysy Arys qalasynyń 20 jasar turǵyny temir tulpar almaqshy bolǵan aǵasyn óltirip, aqshasyn alyp ketken.
"Ótken aptada OQO-nyń 29 jasar turǵyny avtokólik almaqshy bolyp Almatyǵa kelgen. Onyń sońynan aqshasyn tartyp almaq bolyp, aram pıǵylmen nemere inisi de attanady. Qalaǵa kelgen ol Bostandyq aýdany Gagarın kóshesi boıynda aǵasyn taýyp alyp, ishinen birneshe pyshaq jaraqatyn salady. Odan keıin aqasha salynǵan sómkesin alyp, qylmys jasaǵan jerden taıyp turǵan", -deıdi Bostandyq aýdany ІІB-nyń bastyǵy Shamıl Shúkibasov.
Týysqandar arasyndaǵy janjal túngi ýaqytta oryn alǵan. Al zardap shekkenniń denesin sol mańda turatyn adamdar tańǵa qaraı baıqap polıtsııaǵa habarlaǵan.
"Mert bolǵan jigittiń qalaǵa ne maqsatpen kelgeni belgili bolǵan soń, qylmystyń shyǵý tegi de anyqtala bastady. Biraz saǵat ótkende jedel-tergeý is-sharalary kúdiktilerdiń tizimin anyqtap, onyń qataryna jábirlenýshiniń nemere inisiniń de ilikkendigi belgili boldy. Ol qylmys jasaǵan soń qaladan ketip, Shymkentke baryp jasyrynǵan. Krımınaldy polıtsııanyń eń tájirıbeli qyzmetkerleri ony jalǵa alǵan páterinde quryqtady", -dep atap ótti Sh.Shúkibasov.
Qylmysker úıine ketip bara jatqan jolda Jambyl oblysy aýmaǵynda aǵasynyń telefony men basqa da aıǵaq zattaryn tastap ketken. Qazir arnaıy qurylǵan jedel-tergeý toby tergeý jumystaryn júrgizip, aıǵaq zattardy jınaý úshin Jambyl oblysyna júrip ketken.
