5 myń almatylyq álemniń bedeldi JOO-larynda tegin bilim alý múmkindigine ıe boldy
ALMATY. QazAqparat - Almatylyqtarǵa biliktiligin arttyrý úshin Coursera.org saıtynan 5 myń tegin lıtsenzııa beriledi.
Bul týraly óńirlik kommýnıkatsııalar qyzmetiniń alańynda ótken onlaın brıfıngte Almaty qalalyq tsıfrlandyrý basqarmasynyń basshysy Baıan Qońyrbaev málimdedi, dep habarlaıdy QazAqparat tilshisi.
Búginde oqý ornynda bilim alý úshin dárister men praktıkalyq sabaqtarǵa kúndelikti barý qajet emes. Elde indet tarap jatqan tusta onlaın formattyń ózektiligine taǵy bir kóz jetkizdik.
Úıden shyqpaı-aq oqyp, bilim alýǵa bolatyn kóptegen veb-saıttar men qyzmetter bar. Bul qyzmetterdiń ishindegi eń úlkeni jáne bedeldisi - Coursera saıty bolyp tabylady.
«Almatynyń Tsıfrlandyrý basqarmasy men jumyspen qamtý ortalyǵy Coursera kompanııasymen álemniń jetekshi ýnıversıtetterine 5 myń stýdentti aqysyz qabyldaý týraly kelisimge qol jetkizdi. Kelisimge sáıkes 2020 jyldyń 31 jeltoqsanyna deıin almatylyqtar tegin bilim ala alady. Bul múmkindik tirkeý protsesin 2020 jyldyń 30 qyrkúıegine deıin aıaqtaǵan paıdalanýshylarǵa ǵana beriledi», - dedi Baıan Qońyrbaev.
Coursera - bul álemniń úzdik ýnıversıtetteriniń onlaın kýrstaryn usynatyn onlaın bilim berý platformasy. Qazirgi ýaqytta onyń 48 elde 200-den astam seriktesi bar. Bul seriktester - Stenford, Pensılvanııa, Prınston, Mıchıgan, Beıjiń ýnıversıtetteri. Sonymen qatar Coursera IBM, Google jáne PwC sııaqty kompanııalarmen seriktestik ornatty. Bul kompanııalar da Coursera boıynsha kýrstar júrgizip jatyr.
Coursera qalaı jumys isteıdi?
Kýrsqa tapsyrmalar, apta saıynǵy testter jáne qorytyndy emtıhan kiredi jáne kýrs sońynda sertıfıkat beriledi. Ár kýrs uzaqtyǵy - tańdaǵan baǵdarlamaǵa baılanysty 6-10 apta aralyǵyn qamtıdy.
Onlaın-platformada barlyq materıaldar bir jerde bolady. Óıtkeni júıege sózdik, jattyǵý jıyntyqtary biriktirilgen. Munyń bári qajetti baǵdarlamany ońaı izdep, tabýǵa kómetesedi. Kýrstar jańadan bastaýshylarǵa da, bilim deńgeılerin jetildirgisi keletinderge de arnalady.
Qalaı ótinish berýge bolady?
Álemdegi eń jaqsy bilim beretin saıttardyń kýrstaryna qatysý úshin, aty-jóni, qyzmet túri jáne elektrondy poshtasy kórsetilgen ótinishti almaty.coursera@mail.kz elektrondy mekenjaıyna jiberý kerek. Sodan keıin elektrondy poshtaǵa shaqyrý jiberiledi. Tirkelgennen keıin saıtta usynylǵan kez-kelgen kýrsty, mysaly IT, qoldanbaly jáne gýmanıtarlyq ǵylymdar, ekonomıka, medıtsına, menedjment jáne marketıng jáne t.b. kýrstaryn tańdaı alady.
Ótinim bergennen keıin 5 kún ishinde jaýap keledi. Eger jeke kabınet eki aptadan artyq qoldanylmasa, birden joıylady.
