5 mlrd qaralym: Qytaılyq platformalarda Qazaqstanǵa qyzyǵýshylyq artyp keledi
ASTANA. KAZINFORM – Qazaqstannyń týrıstik aımaqtary Qytaıdyń tanymal Douyin, Xiaohongshu sekildi áleýmettik jelilerinde jarnamalanyp jatyr. Byltyr qytaılyq platformalarǵa júktelgen Qazaqstan týraly beınerolıkter 5 mıllıardtan astam qaralym jınaǵan.
Bul týraly Kazakhstan Zowoyoo Technology Co., Ltd kompanııasy dırektorlar keńesiniń tóraǵasy Fý Sıýetszıa Kazinform tilshisine bergen suhbatynda habarlady.
– Qazaqstannyń týrıstik áleýeti sheksiz. Men bul eldiń biraz bóligin araladym. Ádemi jerler óte kóp. Biraq bul jerler týraly kóp adamnyń bilýi úshin jumys isteý qajet. Sondaı-aq Qazaqstannyń týrıstik kompanııalaryn qarjylandyryp, ınfraqurylymdy damytý úshin ınvestorlar tartý kerek. Bizdiń kompanııa osy jumystardy jalǵastyrý arqyly Qazaqstannyń týrızm salasyna jyl saıyn 2–3 mlrd AQSh dollary kóleminde tabys túsirýdi kózdep otyr, - deıdi qytaılyq kásipker.
Bir aı buryn Qytaıdyń jetekshi tsıfrlyq platformalarynyń biri Zowoyoo kompanııasy men Kazakh Tourism arasynda memorandýmǵa qol qoıylǵan edi. Bul qujat Qazaqstannyń týrıstik áleýetin Qytaı naryǵynda tsıfrlyq formatta keńinen dáripteýge baǵyttalǵan. Qytaılyq týrısterdi tartý maqsatynda elimizdiń ásem jerleri týraly aqparattar qytaı tiline saýatty aýdarylyp, sol eldiń tanymal platformalaryna júkteledi. Qazaqstandaǵy týrıstik agenttiktermen de yntymaqtastyq ornatylyp, servıster ortaq platformaǵa biriktiriledi. Nátıjesinde qytaılyq týrıster elimizdegi týrlardy alý, qonaqúılerde bólme brondaý jáne basqa da qyzmet túrlerin Qytaıdan shyqpaı-aq onlaın túrde, aldyn ala oryndaı alady.
– Qytaı – biz úshin eń basym naryqtardyń biri. Byltyr Qytaıdan kelgen qonaqtardyń sany 655 myńǵa jetip, 80%-ǵa deıingi ósimdi kórsetti. Al bıyl osyndaı jobalardyń arqasynda keletin týrısterdiń sanyn 700 myńnan asyryp, 800 myńǵa deıin jetkizýge maqsat qoıyp otyrmyz, - deıdi Kazakh Tourism UK basqarma tóraǵasynyń mindetin atqarýshy Danıel Serjanuly.
Kórshi halyq kóbine Almaty, Astana jáne Túrkistan oblystaryna barýdy jón kóredi eken. Al mamandar jańa joba aıasynda Shyǵys Qazaqstan, Mańǵystaý, Shymkent syndy ózge de óńirlerge den qoıyp, Qazaqstannyń barlyq týrıstik áleýetin jarnamalaýdy kózdep otyr.
– Qytaılyq kompanııalardyń týrızm salasynda Qazaqstanmen seriktestik ornatýǵa degen qyzyǵýshylyǵy óte joǵary. Biz tek Zowoyoo kompanııasymen ǵana jumys istep jatqan joqpyz. Olar elimizdi jarnamalaý úshin ózderiniń telearnalaryn da alyp keldi. Keshe ǵana Gýandjoýda úlken kezdesý ótkizip, 20-dan astam týrıstik kompanııa Qazaqstannyń prezentatsııasyn jasady. Bul jumystar budan ári de jalǵasa beredi, - deıdi Danıel Serjanuly.
Ulttyq kompanııa tóraǵasy týrızm salasyndaǵy tsıfrlyq jobany júrgizýde ne sebepti Qytaı Halyq Respýblıkasyna basymdyq berip jatqanyn túsindirdi.
– Instagram, Booking sekildi búkil álemge belgili qosymshalarda Qazaqstan áý bastan-aq ózin jarnamalap keledi. Al qytaılyq naryqtaǵy tsıfrlyq ekojúıelerde elimiz týraly aqparat joqtyń qasy, áli de óte az. Sebebi Qytaıda jumys isteıtin platformalardyń landshafty múlde basqa. Sondyqtan týrızm salasyndaǵy tsıfrlyq múmkindikterdi qoldanýda Qytaıǵa barynsha basymdyq berip otyrmyz, - dedi ol.
Aıta keteıik, búgin Astanada “Tsıfrlyq Jibek joly – 2025” forýmy ótti. Shara Qazaqstan men qytaılyq mamandar arasyndaǵy ózara tıimdi áriptestikti damytýǵa baǵyttalǵan. Jıynda tsıfrlyq múmkindikterdi týrızm salasynda keńinen qoldaný tásilderi talqylandy.
Buǵan deıin Týrızm jáne sport mınıstrligi elimizdiń týrıstik óńirlerine jasalǵan ınspektsııalyq saparyn aıaqtaǵanyn habarlaǵan edik.