5 mln teńgeniń bekiresin zańsyz aýlaǵandar ustaldy
ASTANA. QazAqparat - Pavlodar oblysyna bekire tuqymdas súırik balyǵyn zańsyz aýlaǵan brakonerler ustaldy. Bul jaıynda QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy QazAqparat tilshisi.
Onyń atap ótýinshe, «Pavlodar oblystyq orman sharýashylyǵy jáne janýarlar álemi aýmaqtyq ınspektsııasy» RMK balyq sharýashylyǵy bóliminiń memlekettik ınspektorlary Pavlodar aýdanyna qarasty Sychevka aýylynyń tusynda Ertis ózenine reıdtik tekserý sharasyn júrgizgen. Nátıjesinde bekire tuqymdas súırik balyǵyn zańsyz jolmen aýlaǵan Pavlodar oblysynyń eki turǵyny ustalǵan.
«Tekserý barysynda zańsy aýlanǵan bekire tuqymdas balyqtyń salmaǵy 20 keli ekendigi anyqtaldy. Kelgen shyǵyn - 5 mln 50 myń teńge. Zańsyz balyq aýlanǵan jerge Pavlodar oblysy Pavlodar aýdandyq ishki ister basqarmasynyń jedel tergeýshiler toby shaqyryldy. Brakonerlikke qatysty jınalǵan materıal sotqa deıingi biryńǵaı tizilimge tirkeldi jáne sotqa deıin tergeý úshin tergeý organdaryna jiberildi», - dedi ol.
