5 mln teńgege deıingi nesıeni keshirýge ýáde bergen alaıaqtar ustaldy
ASTANA. KAZINFORM – TikTok áleýmettik jelisinde qazaqstandyqtardyń 5 mln teńgege deıingi nesıeleri men aıyppuldaryn tolyq esepten shyǵarýǵa ýáde beretin beınerolıkter taralyp jatyr. Jalǵan aqparatqa qarsy is-qımyl ortalyǵy mundaı usynystardyń artynda fıshıngtik alaıaqtyq jasyrynýy múmkin ekenin eskertti.
Ortalyq málimetinshe, alaıaqtar 18 jastan asqan azamattardyń qaryzdaryn birden keshirýge ýáde beredi. Aqparattyń shynaıy ekenine sendirý úshin memlekettik rámizderdi paıdalanyp, paıdalanýshylardy profıldegi siltemege ótýge shaqyrady.
Mamandar kúdikti siltemege tehnıkalyq taldaý júrgizip, birneshe qaýipti belgini anyqtady.
Alaıaqtar jasaǵan saıt ózin resmı áleýmettik kómek kórsetý servısi retinde tanystyrady. Aldymen paıdalanýshydan týǵan jylyn engizýdi suraıdy. Keıin onyń baǵdarlama talaptaryna sáıkes keletini týraly habarlama kórsetip, Telegram jelisine baǵyttaıdy.
Saıtta keri sanaq taımeri de ornalastyrylǵan. Bul paıdalanýshyny ýaqyt shekteýli ekenine sendirip, asyǵys sheshim qabyldaýǵa ıtermeleý úshin jasalǵan.
Eń qaýiptisi, Telegram arqyly avtorızatsııany rastaǵan adam bógde tulǵalarǵa óz akkaýntyna, jeke hat almasýlaryna jáne oǵan baılanysty derekterge qol jetkizýge múmkindik berýi múmkin.
Tehnıkalyq tekserý kezinde VirusTotal platformasyndaǵy LevelBlue servısi kúdikti resýrsty fıshıngtik saıt retinde, al alphaMountain.ai men Fortinet spam retinde jiktegen.
Sonymen qatar tekserý sátinde saıt domeniniń tirkelgenine nebári 17 kún bolǵany anyqtaldy. Mamandardyń aıtýynsha, domenniń jaqynda tirkelýi ózdiginen alaıaqtyqty dáleldemeıdi. Alaıda basqa belgilermen birge bul jaǵdaı kúdik týdyrady.
– Alaıaqtar azamattardy óz aılasyna túsirýdiń ár kezeńin muqııat oılastyrady. Olar qaryzdardy esepten shyǵarýǵa, qarjylaı kómek kórsetýge ýáde beredi nemese qoǵamdaǵy ózekti máselelerdi paıdalanyp, adamdardyń senimine kirýge jáne olardy ózderine qajetti áreketterge ıtermeleýge tyrysady, – dep eskertti Jalǵan aqparatqa qarsy is-qımyl ortalyǵy.
Mamandar kúdikti saıttardy anyqtaý úshin eń aldymen domen ataýyna nazar aýdarýǵa keńes beredi. Qazaqstannyń resmı memlekettik ınternet-resýrstary .gov.kz domendik aımaǵyn paıdalanady. Al .cfd, .xyz, .top nemese .click sııaqty beıtanys domendik aımaqtarmen aıaqtalatyn saıttardy muqııat tekserý qajet.
Saıtta memlekettik rámizderdiń, resmı logotıpterdiń nemese qorǵalǵan qosylym belgisiniń bolýy onyń memlekettik organǵa tıesili ekenin bildirmeıdi.
Sondyqtan nesıeler men aıyppuldardy esepten shyǵarý týraly aqparatty tek memlekettik organdardyń resmı derekkózderinen teksergen jón.
Eger azamat kúdikti siltemege ótip, Telegram arqyly avtorızatsııany rastap qoıǵan bolsa, qosymshanyń parametrlerinen belsendi seanstardy tekserýi kerek. Beıtanys qurylǵylardy óshirip, eki kezeńdi aýtentıfıkatsııany qosý usynylady.
Ortalyq mamandary azamattardy qarjylaı kómek týraly kúmándi ýádelerge senbeýge, jeke derekterin jarııalamaýǵa jáne belgisiz saıttarǵa akkaýnttaryna kirýge ruqsat bermeýge shaqyrdy.
Aıta keteıik, buǵan deıin Bas prokýratýra Telegram akkaýnttaryn ıemdenýge baǵyttalǵan alaıaqtyqtyń jańa tásili týraly eskertken edi. Qaskóıler jalǵan habarlamalar men kúmándi siltemeler arqyly paıdalanýshylardyń rastaý kodtaryn alýǵa tyrysady.
