5 mln teńge shyǵyn keltirgen: Almaty oblysynda mal urlyǵymen aınalysqandar ustaldy
ASTANA. KAZINFORM — Jambyl aýdanynda polıtsııa qyzmetkerleri mal urlyǵymen aınalysqan qylmystyq topty ustady, - dep habarlaıdy Polisia.kz.
22 aqpanda Uzynaǵash aýylynyń turǵyny polıtsııaǵa sharýa qojalyǵynyń qorasynan 5 jylqysynyń urlanǵany týraly aryzdandy. Beımálim adamdar jábirlenýshige 5 mıllıon teńge kóleminde shyǵyn keltirgen.
– Jedel-izdestirý sharalary barysynda polıtsııa qyzmetkerleri 32 jáne 34 jastaǵy eki kúdiktini ustap, qamaýǵa aldy. Urlanǵan mal tabylyp, zańdy ıesine qaıtaryldy, - dep málimdedi polıtsııa ókilderi.
Atalǵan fakti boıynsha qylmystyq is qozǵaldy. Qazirgi ýaqytta quqyq qorǵaý organdary ustalǵandardyń basqa da osyǵan uqsas qylmystarǵa qatysy bar-joǵyn tekserip jatyr.
Aıta keteıik, jyl basynan beri Jambyl aýdanynyń polıtsııa qyzmetkerleri mal urlyǵymen aınalysqan úsh qylmystyq toptyń áreketine tosqaýyl qoıdy.
Eske salsaq, buǵan deıin Almaty oblysynyń qaı aýdanynda mal urlyǵy jıi bolatynyn jazǵan edik.