5 myńnan astam azamat jańa qorǵanys elementteri bar pasport aldy
ASTANA. KAZINFORM – Abaı oblysynda 5 myńnan astam azamat jańa úlgidegi pasport aldy. Bul týraly ІІM baspasóz qyzmeti habarlady.
2025 jyldyń shilde aıynyń ortasynan bastap el azamattary jańa qorǵanys elementterimen jabdyqtalǵan pasporttardy ala bastady.
Bul ózgeris azamattardyń jeke derekterin qorǵaý deńgeıin arttyrý, qujattardy qoldan jasaýdan saqtaý maqsatynda engizildi. «Jeke basty kýálandyratyn qujattar týraly» zańynyń 26-babyna sáıkes, Іshki ister mınıstrligi azamattardyń pasporttary men azamattyǵy joq adamnyń kýáligin qorǵaýǵa qoıylatyn talaptardy jetildirý boıynsha jumys júrgizip, jańa qorǵanysh elementterin engizýdi pysyqtady.
Sonyń nátıjesinde, Qazaqstan azamatynyń pasporty men azamattyǵy joq adamnyń kýáliginiń 2-betine qorǵanysh golografııalyq plenkaǵa salynǵan barys beınesi bar HDM-elementi (joǵary ajyratymdylyq metaldandyrý elementi) ornalastyrylady. HDM — zamanaýı tehnologııaǵa negizdelgen, qujattardyń qoldan jasalýynan qorǵaý deńgeıin aıtarlyqtaı kúsheıtetin sheshim.
Bul element vızýaldy turǵyda tanymal ári tanýǵa ońaı, sol arqyly qujattyń túpnusqalyǵyn jyldam anyqtaýǵa múmkindik beredi.
Atalǵan ózgeris ulttyq qaýipsizdikke áser etpeıdi, sondaı-aq teris áleýmettik-ekonomıkalyq nemese quqyqtyq saldarǵa ákep soqpaıdy. Jaramdylyq merzimi áli bitpegen qujattar óz kúshinde qala beredi jáne olardy aýystyrý mindetti emes.
Jańa qorǵanys elementi bar pasporttar kelesi jaǵdaılarda beriledi: pasporttyń merzimi aıaqtalǵan kezde, qujat jaramsyz bolyp qalǵan jaǵdaıda nemese azamat óz erkimen aýystyrý týraly ótinish bergende.
Osy jyldyń shilde aıynyń ortasynan beri 5 myńnan astam azamat jańa úlgidegi pasport alǵan. Bul — halyqtyń jeke málimetter qaýipsizdigine degen qyzyǵýshylyǵynyń artqanyn jáne jańartylǵan qujat úlgisine senimniń joǵary ekenin kórsetedi. Qosymsha aqparat pen keńes alý úshin azamattar jergilikti kóshi-qon qyzmetine nemese halyqqa qyzmet kórsetý ortalyqtaryna júgine alady.
Aıta ketelik Qazaqstan pasporty álemdik reıtıngte 61-orynǵa kóterilgen edi.