5 myńǵa jýyq oqýshy Ahmet Jubanovtyń «Bı» kúıin oryndady

Pavlodar oblysynda Ulttyq dombyra kúnine oraı aýqymdy rýhanı-mádenı is-shara ótti. Onyń aıasynda óńirdiń 5 myńǵa jýyq oqýshysy kórnekti qazaq kompozıtory, ǵalym, Qazaqstandaǵy kásibı mýzykalyq bilim berý isiniń negizin qalaýshylardyń biri Ahmet Jubanovtyń «Bı» kúıin bir mezette oryndap, ulttyq mýzyka ónerine qurmet kórsetti.

Myńdaǵan dombyranyń bir mezette kúmbirleýi urpaqtar sabaqtastyǵynyń, ulttyq mádenıetke degen súıispenshilik pen halqymyzdyń rýhanı qundylyqtaryna degen qurmettiń jarqyn kórinisine aınaldy.

Bıylǵy merekeniń máni erekshe. Sebebi ol Ahmet Jubanovtyń týǵanyna 120 jyl tolýymen tuspa-tus kelip otyr.

Aýqymdy sharaǵa «Mýzykalyq kolledj — daryndy balalarǵa arnalǵan mýzykalyq mektep-ınternaty» kesheni, M. Kataev atyndaǵy oblystyq Oqýshylar saraıy, qosymsha bilim berý uıymdary jáne Pavlodar oblysyndaǵy bilim berý uıymdarynyń oqýshylary qatysty.

— Dombyra synybynyń ustazdary úshin Ulttyq dombyra kúni — taǵylymdyq máni zor erekshe mereke. Bıyl bul kúnniń mańyzy odan saıyn arta tústi, óıtkeni Ahmet Jubanovtyń týǵanyna 120 jyl tolyp otyr. Onyń baı shyǵarmashylyq murasy dombyra óneriniń úzdik dástúrlerin saqtap, ony jas urpaqqa jetkizýge shabyt beredi. Ulttyq mýzykaǵa degen súıispenshilik balalarymyzdyń júreginde máńgi saqtalyp, týǵan eliniń tarıhy men mádenıetine degen qurmetin nyǵaıta bersin, — dedi «Mýzykalyq kolledj — daryndy balalarǵa arnalǵan mýzykalyq mektep-ınternaty» kesheni dırektorynyń beıindik oqytý jónindegi orynbasary Dáýren Qýanov.

— Men úshin Ulttyq dombyra kúni — erekshe mereke. Dombyra — halqymyzdyń rýhy men tarıhyn urpaqtan urpaqqa jetkizetin qasıetti aspap. Bıylǵy merekeniń máni tipti tereńdeı tústi, óıtkeni Ahmet Jubanovtyń týǵanyna 120 jyl tolyp otyr. Biz, jas urpaq, onyń baı murasyn maqtan tutamyz, dombyra ónerin súıemiz jáne ony saqtap, damytýǵa árdaıym úles qosa beremiz, — dep óz áserimen bólisti 9 «A» synyp oqýshysy Qarshyǵa Dýman.

Aýqymdy is-shara qazaqtyń kúı óneri men ulttyq mýzykalyq murasyn dáripteýdiń jarqyn úlgisine aınaldy. Ulttyq dombyra kúni myńdaǵan oqýshyny ulttyq mádenıet, el tarıhy men tól ónerimizdiń qundylyqtary tóńiregine biriktirdi. 

Aıta ketelik astanada oqýshylar Dombyra kúnine oraı respýblıkalyq chellendj bastaǵan edi.