5 mıllıon teńge talap etken: Almaty oblysynda jasóspirimdi qorqytyp, bopsalaǵandar ustaldy

ASTANA. KAZINFORM — Almaty oblysynda jasóspirimdi qoqan-loqqy kórsetip, bopsalaǵan kúdiktiler ustaldy. Bul týraly Polisia.kz jazdy. 

Almaty oblysy PD uıymdasqan qylmysqa qarsy kúres basqarmasyna Balqash aýdany Mııaly aýylynyń 42 jastaǵy turǵyny júgindi. Áıeldiń aıtýynsha, 2025 jylǵy 8 aqpanda saǵat 15:00 shamasynda Qyzyl-Qaırat aýylynda belgisiz adamdar onyń kámeletke tolmaǵan ulyn kúshtep Hyundai Elantra avtokóligine otyrǵyzyp, belgisiz baǵytqa alyp ketken. Onyń sózine qaraǵanda, kúdiktiler balany uryp-soǵamyz dep qorqytyp, 5 mıllıon teńge talap etken.

— Atalǵan faktige saı bopsalaý baby boıynsha qylmystyq is qozǵaldy. Tergeý barysynda kúdiktilerdiń jábirlenýshini ınternette jeke vıdeosyn taratamyn dep qorqytyp, bopsalaǵany anyqtaldy — dedi polıtseıler.

Jedel-izdestirý sharalary barysynda polıtsııa qyzmetkerleri kúdiktilerdi 500 myń teńgeniń bir bóligin alý kezinde qolǵa túsirdi. Qazirgi ýaqytta olar ýaqytsha ustaý ızolıatoryna qamalyp, tergeý amaldary júrgizilýde. Osyndaı sharalar «Zań jáne tártip» qaǵıdasyn saqtaýǵa yqpal etedi.

Eske sala keteıik, buǵan deıin ІІM izdeýde júrgen qylmyskerlerdi ustaǵanyn jazǵan bolatynbyz.