5 mamyrda Big Drama Show bolady - Gennadıı Golovkın

ASTANA. QazAqparat - Orta salmaqtaǵy WBA Super, WBC, IBF jáne IBO belbeýleriniń ıegeri Gennadıı Golovkın 5 mamyrda Vanes Martırosıanmen kezdesetinin resmı túrde jarııalady, dep xabarlaıdy QazAqparat tilshisi.

«Men HBO-ǵa qaıta shyǵyp, StubHub Center-diń alańynda judyryqtasýǵa qýanyshtymyn. Sebebi olardyń tamasha boks fanattary bar. Men óz jankúıerlerime taǵy bir Big Drama Show-dy syılaımyn», - dedi G.Golovkın.

GGG-diń qarsylasy - Vanes Martırosıan da óziniń Instagram paraqshasynda aldaǵy jekpe-jektiń posterin salyp: «Men jer-jahandy tańqaldyratyn bolamyn !!!», - dep jazdy.

Aıta keteıik, Vanes Martırosıannyń ulty - armıan. Biraq jeti jasynan bastap AQSh-ta turady. Jasy 31-de. Kásibı boksta 40 jekpe-jek ótkizip, 36 ret jeńiske jetti. Úsh aıqasta utyldy. Bir márte teń tústi. Sońǵy ret Martırosıan eki jyl buryn bokstasqan bolatyn. Sol kezde ol tóreshilerdiń sheshimi boıynsha Erıslandı Laradan jeńilgen edi. Aldaǵy jekpe-jekke shyǵý úshin oǵan bir saty joǵary kóterilýge týra keledi. Sebebi Martırosıan birinshi orta salmaqta óner kórsetedi. Al Golovkın - orta salmaqtyń chempıony.