5 qyrkúıek kúngi aýa raıy boljamy
NUR-SULTAN. QazAqparat - Ońtústik tsıklonnyń ótýine baılanysty 5 qyrkúıek kúni Qazaqstannyń basym bóliginde qubylmaly kún raıy saqtalady – keı jerlerde jańbyr jaýyp, naızaǵaı oınaıdy, daýyl turýy yqtımal. Jaýyn-shashynsyz aýa raıy eldiń tek batysynda saqtalady. Respýblıkanyń keı óńirlerinde tuman, burshaq, ekpindi jel kútiledi, dep habarlaıdy QazAqparat.
Atap aıtqanda, «Qazgıdromet» RMK málimetine sáıkes, Soltústik Qazaqtan oblysynyń keı jerlerinde túnde jáne tańerteń tuman, kúndiz daýyl, 15-25 m/s ekpindegi jel kútiledi.
Qostanaı oblysynyń keı jerlerinde burshaq, túnde keı jerlerinde, kúndiz basym bóliginde jel 15-23 m/s kúsheıedi, túnde jáne tańerteń tuman boljanady.
Aqmola oblysynyń keı jerlerinde jel 15-20 m/s artady, túnde jáne tańerteń tuman, kúndiz burshaq jaýýy yqtımal.
Almaty, Jambyl, Túrkistan, Qyzylorda, Pavlodar, Qaraǵandy oblystarynyń keı jerlerinde jeldiń jyldamdyǵy 15-20 m/s jetedi. Qyzylorda oblysynda - daýyl, Pavlodar oblysynda túnde keı jerlerinde - tuman, Qaraǵandy oblysynyń keı jerlerinde burshaq boljanady.
Sondaı-aq Túrkistan, Atyraý oblystarynda, Qyzylorda, Jambyl, Qaraǵandy oblystarynyń keı jerlerinde, Almaty, Aqtóbe oblystarynyń jekelegen aýdandarynda óte joǵary órt qaýpi saqtalady.
Budan bólek, túnde Batys Qazaqstan oblysynyń keı jerlerinde topyraq ústinde 1-3 gradýs úsik júredi.
