5 kodeks, 9 zań jáne 28 normatıvtik-quqyqtyq akti jańa Sý kodeksine sáıkestendiriledi

ASTANA. KAZINFORM — Sý resýrstary jáne ırrıgatsııa mınıstrligi jańa Sý kodeksiniń jobasyn ázirlep, Parlament Májilisine engizdi. Oǵan qosymsha Azamattyq, Jer, Ekologııalyq, Kásipkerlik, Jer qoınaýy jáne jer qoınaýyn paıdalaný týraly kodeksterge ózgerister engiziledi. Bul týraly vedomstvonyń baspasóz qyzmeti málim etti. 

Sondaı-aq, 28 normatıvtik-quqyqtyq akti men 9 zań jańa Sý kodeksine sáıkestendiriledi. Bul «Jergilikti memlekettik jáne ózin-ózi basqarý týraly», «Erekshe qorǵalatyn tabıǵı aýmaqtar týraly», «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly», «Agroónerkásiptik keshendi jáne aýyldyq aýmaqtardy damytýdy memlekettik retteý týraly», «Ruqsattar jáne habarlamalar týraly», «Elektr energetıkasy týraly», «Jańartylatyn energııa kózderin paıdalanýdy qoldaý týraly», «Janýarlar dúnıesin qorǵaý, ósimin molaıtý jáne paıdalaný týraly», «Aýyl sharýashylyǵy kooperatıviniń qyzmeti týraly» zańdar.

«Jańa Sý kodeksi — bul sý salasynyń negizgi júıesi bolatyn irgeli qujat. Qujattyq bólik kópshilikke árdaıym qyzyq bola bermeıtinin túsinemiz, biraq bul kodekstiń negizi jáne Qazaqstannyń sý zańnamasyn ózektendirýge múmkindik beretindeı etip jasadyq. Kodeks shynymen tıimdi bolýy úshin basqa qujattarǵa da ózgerister engiziledi. Bul rette túzetýler aýyl sharýashylyǵynan bastap qorshaǵan ortany qorǵaý men elektr energetıkasyna deıingi barlyq múmkin baǵyttardy qamtıdy», - dedi Sý resýrstary jáne ırrıgatsııa birinshi vıtse-mınıstri Bolat Beknııaz.