5 qyrkúıekte Qazaqstannyń úsh oblysynda orman órti tirkeldi
ASTANA. KAZINFORM — Qazaqstanda táýligine úsh orman órti tirkeldi. Aqmola, Almaty jáne Soltústik Qazaqstan oblystarynda tilsiz jaýmen kúreske qajetti kúshter men quraldar jumyldyrylyp, órtti tolyq sóndirý jumystary júrgizilip jatyr. Bul týraly Ekologııa mınıstrligi málim etti.
Aqmola, Almaty jáne Soltústik Qazaqstan oblystarynda orman órtteri oryn alǵandyǵy týraly aqparat kelip túsken sátten bastap qajetti kúshter men quraldar jumyldyrylyp, órtti tolyq sóndirý jumystary jedeldetildi.
Órt sóndirý jumystaryna «Kazavıaormanqorǵaý» RMKQ mekemesiniń sý tógý quralymen jabdyqtalǵan tikushaǵy men orman kúzeti qyzmetkerleri qatysýda. Birqatar óńirlerde naızaǵaıly fronttar men aptap ystyqtyń saqtalýyna baılanysty órt qaýpi joǵary deńgeıde qalyp otyr. Osyǵan baılanysty memlekettik orman kúzeti men RMQK «Qazavıaormanqorǵaý» kúshteri kúsheıtilgen rejımde jumys atqaryp, áýe jáne jerústi patrýldeý jumystary úzdiksiz júrgizilip jatyr.
— Órt qaýipti kezeńde azamattardy órt qaýipsizdigi talaptaryn qatań saqtaýǵa, tabıǵat aıasynda qaýipsizdik sharalaryna jaýapkershilikpen qaraýǵa jáne otty paıdalaný kezinde barynsha saqtyq tanytýǵa shaqyramyz, — dep eskertti mınıstrlikten.
Aıta keteıik, buǵan deıin Almaty oblysynda órtti sóndirý jumystary jalǵasyp jatqanyn jazdyq. Qazirgi ýaqytta tórt oshaqtyń úsheýi oqshaýlanǵan, al tórtinshi ýchaskede tilsiz jaýmen kúres kúsheıtilgen rejımde júrgizilip jatyr.
