5 qyrkúıekte Qazaqstannyń taýly aımaqtarynda jańbyr men qar jaýady
ASTANA. KAZINFORM – 5 qyrkúıekte Qazaqstannyń basym bóliginde jaýyn-shashynsyz aýa raıy saqtalady, al ońtústik-shyǵystaǵy taýly aýdandarda jańbyr men qar jaýady, dep habarlaıdy «Qazgıdromet» RMK.
Sınoptıkterdiń boljamynsha, keń aýqymdy antıtsıklon elimizdiń basym bóligine áser etedi. Tek respýblıkanyń ońtústik-shyǵysy men batysynda atmosferalyq fronttardyń ótýine baılanysty naızaǵaı oınap, jańbyr jaýady.
Túnde ońtústik-shyǵystyń taýly aýdandarynda jaýyn-shashyn jańbyr men qar túrinde túsedi.
Elimizdiń batysynda, ońtústiginde jáne shyǵysynda jel kúsheıedi. Ońtústik óńirlerde shańdy daýyl boljanady. Shyǵys, ońtústik-shyǵys jáne ortalyq aımaqtarda túnde jáne tańerteń tuman túsedi.
– Túnde Shyǵys Qazaqstan oblysynyń taýly aýdandarynda 2 gradýs úsik kútiledi, – delingen «Qazgıdromet» boljamynda.
Sonymen qatar birqatar óńirde órt qaýpi joǵary bolady. Batys Qazaqstan jáne Qostanaı oblystarynyń soltústik-batysynda, Abaı oblysynyń ońtústiginde, Aqtóbe oblysynyń soltústik-shyǵysy men soltústik-batysynda, Mańǵystaý oblysynyń ortalyǵynda, Qaraǵandy oblysynyń ortalyǵy men shyǵysynda joǵary órt qaýpi saqtalady.
Almaty jáne Jetisý oblystarynyń soltústiginde, Aqmola oblysynyń soltústigi men ońtústik-batysynda, Soltústik Qazaqstan oblysynyń shyǵysy men ońtústiginde de joǵary órt qaýpi kútiledi.
Qyzylorda, Túrkistan, Jambyl, Atyraý, Batys Qazaqstan, Mańǵystaý, Aqtóbe jáne Ulytaý oblystarynda tótenshe órt qaýpi saqtalady.
Sondaı-aq Qostanaı oblysynyń ońtústigi, ońtústik-shyǵysy men ortalyǵynda, Almaty oblysynyń batysy, shyǵysy men ortalyǵynda, Jetisý oblysynyń ońtústigi men shyǵysynda tótenshe órt qaýpi boljanady.
Aıta keteıik, búgin 15 óńirde kún raıyna baılanysty eskertý jarııalandy.
