5 qańtardan bastap AÁK taǵaıyndaýǵa qujattar qabyldanady
NUR-SULTAN. QazAqparat – Elordada halyqty AÁK barynsha qamtý jáne AÁK taǵaıyndaý boıynsha sapaly tásildi qamtamasyz etý maqsatynda 2020 jyldyń 5 qańtarynan bastap azamattardy qabyldaý bastalady, dep habarlaıdy qala ákimdiginiń resmı saıty.
Ataýly áleýmettik kómek ótinish berilgen aıynan bastap, ótinish berilgen kúnine qaramastan taǵaıyndalady. Mysaly, qujat 20 qańtarda tapsyrylsa, tólem tolyq aı boıy tólenedi. Qujattar «Januıa» otbasy ınstıtýtyn qoldaý ortalyǵynda, «Almaty», «Baıqońyr», «Esil», «Saryarqa» aýdandarynda qabyldanatyn bolady. Habarlasqan azamatqa, ótinish, jeke kýálikti usyný kerek.
Sondaı-aq, AÁK-ti taǵaıyndaý úshin turǵylyqty jerińizde turaqty nemese keminde 6 aı ýaqytsha tirkelgen bolýy kerek. Halyqtyń áleýmettik osal toptaryna kómek kórsetýdiń jańa formatyna sáıkes 2020 jyldyń 1 qańtarynan bastap kópbalaly otbasylarǵa aı saıynǵy memlekettik járdemaqy tóleý (kiristerdi esepteýsiz) qarastyrylǵan. Járdemaqy mólsheri: 4 balaǵa - 42 496 teńge; 5 bala - 53 127 teńge; 6 bala - 63 757 teńge; 7 jáne odan kóp balaǵa - 74 388 teńgeni quraıtyn bolady.
Qujattardy qabyldaý «Esil», «Saryarqa», «Baıqońyr» jáne «Almaty» aýdandarynyń Halyqqa qyzmet kórsetý ortalyqtarynda, sondaı-aq «Januıa» otbasyn qoldaý ınstıtýtynyń ortalyǵynda, «Almaty», «Baıqońyr», «Esil» jáne «Saryarqa» aýdandarynyń ákimdikterinde júrgiziledi. Jospar boıynsha 14 myńǵa jýyq adamdy qamtý qarastyrylyp otyr. Sondaı-aq, AÁK alatyn az qamtylǵan otbasylarynan shyqqan balalardy kepildi áleýmettik paketpen qamtamasyz etý josparlanýda.