5 qańtarda respýblıka joldaryndaǵy ahýal qandaı

ALMATY. KAZINFORM – «QazAvtoJol» ulttyq kompanııasy eldegi joldardyń qazirgi ahýaly týraly habarlady.

Ulttyq kompanııanyń málimetinshe, 2026 jylǵy 4 qańtar saǵat 09:30-dan bastap Qaraǵandy oblysynda aýa raıynyń qolaısyzdyǵyna baılanysty respýblıkalyq mańyzy bar «KAZ01 Astana – Qaraǵandy – Almaty» avtojolynyń 92-164-shaqyrymynda (Anar stantsııasynan Temirtaý qalasyna deıin) barlyq kólik túri úshin jyldamdyq rejımi 140 shaq/saǵ-tan 110 shaq/saǵ-qa deıin shekteldi.

Sonymen qatar 2026 jylǵy 4 qańtar saǵat 22:00-de Aqmola oblysynda aýa raıy jaǵdaıynyń jaqsarýyna baılanysty respýblıkalyq mańyzy bar «KAZ02 Astana – Kókshetaý (aınalma jol) – Petropavl – RF shekarasy (Jańa Jol ótkizý pýnkti)» avtojolynyń 18-232-shaqyrymynda barlyq kólik túri úshin jyldamdyq rejımi 80 shaq/saǵ-tan 110 shaq/saǵ-qa deıin ózgertildi.

Al Shyǵys Qazaqstan oblysynda tirkemesi bar jáne jartylaı tirkemeli júk kólikteriniń qozǵalysy Osınov asýynda ýaqytsha shekteldi. Shekteý «Óskemen – Altaı – Katonqaraǵaı – Rahman qaınary» avtojolynyń 46-66-shaqyrymyndaǵy (Severnoe aýyly – Serebrıansk qalasy) ýchaskesinde qys aıaqtalǵansha saqtalady.

Sonymen birge «Astana – Shiderti – Pavlodar – Ýspenka – RF shekarasy» avtojolyndaǵy jolaıryqtyń kópir qurylymynyń shetki arqalyqtary zaqymdanýyna baılanysty «Qalqaman» jolaıryǵy ýchaskesi jabyldy. Atap aıtqanda, Qalqaman kentine kireberis pen Astana baǵytyna shyǵatyn jol ýaqytsha jabyq.

Eske salaıyq, buǵan deıin «Qazgıdromet» RMK sınoptıkteri 5 qańtarda eldiń basym bóliginde qolaısyz aýa raıyna baılanysty eskertý jasaǵan edi.