5 balanyń ólimine baılanysty qylmystyq is qozǵaldy - Qasymov
ASTANA. QazAqparat - Elordada órt saldarynan 5 balanyń qaza bolýyna baılanysty qylmystyq is qozǵaldy. Bul týraly búgin Úkimet otyrysynan keıin QR Іshki ister mınıstri Qalmuhanbet Qasymov aıtty, dep habarlaıdy QazAqparat tilshisi.
«Biz oryn alǵa oqıǵa faktisi boıynsha qylmystyq is qozǵadyq. Saraptama júrgizý qajet. Órttiń shyǵýyna jylytý peshi sebep bolǵan», - dedi mınıstr BAQ ókilderiniń saýalyna oraı.
Onyń aıtýynsha, bul órt shyǵýynyń aldyn ala sebebi ǵana. Al naqty sebep arnaıy júrgizilip jatqan saraptamalardyń qorytyndysynan keıin belgili bolady.
Osy rette BAQ ókilderi mınıstrden «ata-analyq mindetin durys atqarmaǵan degen jeleýmen balalardyń ákesi men sheshesine qylmystyq is qozǵalýy múmkin be?» dep suraǵan edi.
«Bul rette ata-ananyń qandaı mindettemesi bolýy múmkin? Menińshe, bul ondaı jaǵdaı emes. Biz qylmystyq isti fakti boıynsha qozǵadyq. Óıtkeni, saraptama júrgizý qajet. Órttiń shyǵý sebebin anyqtaǵymyz keledi», - dedi Q.Qasymov.
Búgingi Úkimettiń selektorlyq rejimdegi otyrysynda QR Premer-Mınıstri Baqytjan Saǵyntaev órtten qaza tapqan 5 balanyń ata-anasyna kóńil aıtqan bolatyn.
Eske sala keteıik, 4 aqpan kúni túnde elordanyń Saryarqa aýdanyndaǵy «Kóktal-1» turǵyn úı alabynda jeke úıdiń aýlasynda turǵyzylǵan ýaqytsha baspanada órt shyqty. Órtti sóndirý barysynda 2006, 2008, 2014, 2016, 2018 jylǵy 5 qyz balanyń denesi tabyldy.
Olardyń kishisi nebári 11 aılyq sábı edi. Órt kezinde bes balanyń ata-anasy túngi jumysta bolǵan.
