5 balanyń ómirin qıǵan Jitiqaradaǵy órt: Oblys ákimi málimdeme jasady

QOSTANAI. KAZINFORM — Qostanaı oblysynyń ákimi Qumar Aqsaqalov Jitiqaradaǵy qaıǵyly oqıǵanyń mán-jaıyna toqtaldy. Bul týraly Nasha gazeta basylymy jazdy.

Oblys basshysy Jitiqaradan kelip, Rýdnyı qalasynyń turǵyndarymen kezdesýinde bolǵan jaıtqa qatysty pikir bildirdi.

«Endi komıssııa tekseredi. Biz qazir osyndaı qaıǵyly oqıǵalardyń aldyn alýy tıis bolǵan qyzmetter óz mindetin atqardy ma, joq pa, tekserip jatyrmyz. Birinshiden, esepte turǵan otbasylardy gaz analızatorlarymen jabdyqtaýymyz kerek. 2019 jyly ol úıge gaz analızatory ornatylǵan. Ol jumys istep turǵan», — dedi ol.

Ákimniń aıtýynsha, jylyna eki ret jáne jylytý maýsymy bastalǵanǵa deıin mindetti túrde tótenshe jaǵdaılar qyzmetiniń mamandary bul qurylǵylardy tekseredi. Olar tamyz aıynda ǵana osy úıdi teksergen eken.

«Biraq, balanyń aıtýynsha, birdeńe órtenip ketken. Barlyq mán-jaıdy komıssııa anyqtap jatyr. Ókinishke qaraı, osyndaı qaıǵyly oqıǵa boldy. Keshirim suraımyz», — dedi oblys ákimi.

Ákim otbasyǵa kómek kórsetiletinin aıtty.

«Búgin nemese erteń barlyq qajetti qural-jabdyqtary bar turǵyn úı satyp alynady, bir-eki kúnde jasaımyz. Zardap shekken otbasy buryn ataýly áleýmettik kómek alýshy retinde esepte turǵan. Ókinishke qaraı, balardyń ákesi túrmede, anasy qaladaǵy dúkenderdiń birinde jumys istegen», — deıdi Qumar Aqsaqalov.

Eske sala keteıik, qaıǵyly oqıǵa 11 qazan kúni bolǵan edi.