5 balanyń ákesiniń ólimi: Aqtaýda bir adam 8 jylǵa sottalyp, ekeýi sot zalynan bosatyldy
AQTAÝ. KAZINFORM – Mańǵystaý oblysynyń qylmystyq ister jónindegi mamandandyrylǵan aýdanaralyq sotynda bes balanyń ákesi, 52 jastaǵy Aslan Qydyrbaevtyń ólimine qatysty sot úkimi shyqty.
4 qyrkúıekte ótken sot otyrysynda sottalýshylardyń birine «Adam óltirý» baby boıynsha 8 jylǵa bas bostandyǵynan aıyrý jazasy taǵaıyndaldy. Al taǵy eki adam 3 jylǵa shartty túrde sottalyp, sot zalynan bosatyldy.
Alaıda, marqumnyń týystary sot sheshimine kelispeıtinderin jetkizdi.
- Biz bul úkimmen kelispeımiz. Prokýror 17 jáne 15 jyldan suraǵan edi, biraq bul oryndalmady. Olar top bolyp áreket etip, adamnyń ólimin keshke deıin jasyrǵan. Sonda olardy qalaısha sot zalynan bosatýǵa bolady? Bul - ádiletsizdik. Men sońyna deıin sot tóreligine sendim. Alaıda tergeý basynan bastap durys júrgizilmedi, - deıdi marqumnyń jubaıy Janar Espaeva.
Eske salaıyq, qaıǵyly oqıǵa ótken jyldyń 2 jeltoqsanynda bolǵan. Tórt er adam Qaraqııa aýdanyndaǵy Temirbaba jerine túnde ań aýlaýǵa barǵan. Sol kezde Aslan Qydyrbaev oqqa ushqan.
Polıtsııa bastapqyda oqıǵaǵa qatysty abaısyzda qarý qoldaný saldarynan bolǵan jazataıym jaǵdaı nusqasyn jarııalady. Sonyń saldarynan Aslan Qydyrbaev atylyp qalǵan degen boljam aıtyldy.
Alaıda marqumnyń týystary bul boljammen kelispeıdi. Olardyń aıtýynsha, ań aýlaýǵa barǵan adamdar máıitti shamamen 9 saǵat boıy pıkap kóliginiń júksalǵyshynda tasymaldaǵan. Bul ýaqytta jedel járdemge de, polıtsııaǵa da habar bermegen. Sondaı-aq, olar marqumdy Jańaózendegi jaqyn aýrýhanaǵa aparmaı, 300 shaqyrym jerdegi Aqtaýǵa alyp barǵan.
Redaktsııa úkimge qatysty Mańǵystaý oblystyq sotyna suraý joldady.
Buǵan deıin, Aqtaýda 36 shetel azamaty jaýapkershilikke tartyldy.
