5 bala kóz jumǵan apat: Júk kóliginiń júrgizýshisi qamaýǵa alyndy
AQTÓBE. KAZINFORM — Samara — Shymkent tasjolynyń Hromtaý aýdany Bógetsaı aýyly mańynda bolǵan jol apatynan soń júk kóliginiń júrgizýshisi qamaldy. Qazirgi kezde birneshe saraptama taǵaıyndalǵan.
Aqtóbe oblystyq PD bastyǵynyń orynbasary Ǵalym Baıjanovtyń aıtýynsha, eki jáne odan da kóp adamnyń ólimine ákep soqqan jol-kólik apatynan soń tergep-tekserý júrgizilip jatyr.
Kúdikti «MAN» kóliginiń júrgizýshisi ýaqytsha ustaý ızolıatoryna qamaldy.
— Polıtsııa departamenti balalardyń ómiri men densaýlyǵynyń qaýipsizdigin qamtamasyz etý mindetterin tıisinshe oryndamaý faktisi boıynsha sotqa deıingi tergep-tekserý jumystary bastady. Barlyq jaýapty tulǵalarǵa quqyqtyq baǵa beriledi. Qajetti saraptamalar taǵaıyndaldy, — dedi Ǵalym Baıjanov.
Aıta keteıik, 7 tamyz kúni Samara — Shymkent tasjolynda jol apaty bolyp, 5 bala, úsh eresek adam kóz jumdy.
Arasynda ákesi men eki balasy da bar.
Osy oqıǵadan soń oblys ákimdigi jumys toby qurylǵanyn habarlady.
