5-6 shilde kúnderi Astanada ashyq alańda alaman aıtys ótedi
ASTANA. QazAqparat - Astana kúni merekesine arnalǵan «Myńjyldyqtar toǵysyndaǵy Astana» kóshpeliler órkenıeti festıvali aıasyndaǵy jyl saıyn dástúrli túrde ótetin respýblıkalyq aqyndar aıtysy bıyl da jalǵasyn tappaq.
«Han Shatyr» oıyn-saýyq ortalyǵy mańyndaǵy ashyq alańda ótken aıtýly dodanyń byltyrǵy dúbiri kópshilik kórermenniń áli esinde bolar. Eki kúnge sozylǵan alaman jyr dodasynda Jaqsylyq Orynbasar men Rınat Zaıytov bir-birine bir upaı da utqyzbaı márege qatar jetip, bas júldeni qaq bólip alyp edi. Esterińizde bolsa, sol aıtysqa jınalǵan kórermen aq shatyrdyń astyna syımaı qalǵan-dy.
Bıyl altynshy ret uıymdastyrylyp otyrǵan Astanamyzdyń on alty jyldyǵyna arnalǵan shara 5-6 shilde kúnderi ótedi. Osy aıtysty uıymdastyryp júrgen aqyn Serik Qalıevtiń aıtýynsha, oǵan kelesi júırikter qatysady.
Basty shaharymyz Astana qalasynan Jaqsylyq Orynbasar, Aısáýle Beısenhan qatyssa, Almatydan Sáken Orynbasaruly men Farhat Maratuly óz baqtaryn synamaq. Sondaı-aq elimizdiń ár óńirlerinen at arytyp kelgen aıtyskerler Alık Bekmusaev (Jambyl oblysy), Karıma Oralova (Ońtústik Qazaqstan oblysy), Azamat Maljanbaı (Qostanaı oblysy), Smaǵul Jumadil (Almaty oblysy), Muhtar Nııazov (Qyzylorda oblysy), Aıaýlym Jumabekqyzy (Almaty oblysy), Darhan Ábdimanap (Jambyl oblysy), Maqsat Ahanov (Qaraǵandy oblysy), Qazybek Baıjumanov (Shyǵys Qazaqstan oblysy), Eldar Ihsanov (Batys Qazaqstan oblysy), Erjeńis Ábdıev (Qyzylorda oblysy), Saadat Nurmanov (Atyraý oblysy) jyr dodasyna túsedi, dep habarlaıdy kazaitys.kz.
