5,5 myńǵa jýyq aqmolalyq Jeńis kúnine oraı materıaldyq kómek alady

ASTANA. QazAqparat - Aqmola oblysynda Jeńis kúni qarsańynda Ekinshi dúnıejúzilik soǵys maıdangerlerine materıaldyq kómek beriledi. Barlyq tólemder 9 mamyrǵa deıin jasalady, dep habarlaıdy «QazAqparat» HAA Óńirlik kommýnıkatsııalar qyzmetine silteme jasap. 

«Óńirde bir rettik tólenetin materıaldyq kómektiń somasy anyqtaldy: Ekinshi dúnıejúzilik soǵystyń múgedekteri men qatysýshylaryna 76 AEK kóleminde, ıaǵnı 172 400 teńge tólenedi. Kókshetaý qalasynda bul tólemniń somasy 200 myń teńgeni quraıdy. Sonymen qatar, Aýǵan soǵysy men Chernobyl apatynyń múgedekteri, Vengrııadaǵy oqıǵanyń qatysýshylary, burynǵy KSRO-ny qorǵaý barysynda múgedek bolyp qalǵan áskerı qyzmetshiler, kontslager tutqyndary, «Lenıngradty qorǵaǵany úshin» medali jáne «Qorshaýdaǵy Lenıngrad turǵyny» tósbelgisimen marapattalǵandar, soǵys jyldary qaza tapqandardyń jesirleri jáne t.b. tulǵalar bir rettik materıaldyq kómek alatyn bolady», - delingen habarlamada.

Aqmola oblysy boıynsha bir rettik kómek kórsetý úshin jergilikti bıýdjetten 63 mln teńge bólinip, 5488 adamǵa beriledi.

Qazirgi tańda óńirde 3668 Ekinshi dúnıejúzilik soǵystyń qatysýshylary men múgedekteri, Soǵys jyldary tylda eńbek etken 176342 adam, kontslagerdiń, gettonyń jáne basqa da májbúrlep ustaý oryndarynyń burynǵy kámeletke tolmaǵan 548 tutqyny, soǵys kezindegi áskerı qyzmetshilerdiń, partızandardyń, astyrtyn jumys isteýshilerdiń, qaza tapqandardyń ekinshi ret turmys qurmaǵan 110 jesiri, qaza tapqan soǵys múgedekteriniń 9386 jubaıy turady.