5,3 myńnan astam adam jańa bıznes-ıdeıalardy iske asyrý úshin granttar aldy
Birinshi jáne ekinshi lek boıynsha granttar alýǵa ótinimder osy jylǵy naýryz jáne mamyr aılarynda bekitilgen kestege sáıkes qabyldandy.
Osylaısha, ótken eki lek sheńberinde úmitkerlerden barlyǵy 51,2 myń, onyń ishinde kópbalaly otbasylardan – 30,1 myń, múgedektigi bar adamdardan – 8,7 myń, múgedektigi bar balaǵa kútim jasaıtyn adamdardan – 6,1 myń, ataýly áleýmettik kómek alýshylardan – 2,7 myń ótinish qabyldandy. Sondaı-aq, asyraýshysynan aıyrylǵan 2,01 myń adam, 160 qandas jáne 506 qonys aýdarýshy ótinish berdi.
Ótinimderdiń eń kóp sany Túrkistan (11,6 myń) jáne Jambyl (5,5 myń) oblystarynyń jáne Shymkent qalasynyń (6 myń), eń az sany Ulytaý (365) jáne Aqmola (611) oblystarynyń úmitkerlerinen kelip tústi.
Memlekettik grant – nysanaly maqsaty jańa bıznesti bastaý jáne damytý bolyp tabylatyn qaıtarymsyz beriletin bastapqy kapıtal. Grant mólsheri 400 AEK-ke deıin (1 380 000 teńge). Árbir qatysýshy ony tek bir ret qana ala alady.
Granttardy halyqty jumyspen qamtý ortalyqtary grant alýǵa úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi.
Úmitkerler ózderiniń bıznes-jobalaryn komıssııa otyrystarynda tanystyrady. Komıssııa otyrysynyń ótkiziletin orny, kúni men ýaqyty týraly habarlama Business.enbek.kz portalynda grant alýǵa ótinish berýshiniń jeke kabınetinde kórsetiledi.
Bul rette komıssııanyń árbir múshesi bıznes-jospardy baǵalaıdy jáne baǵalaý paraǵyn mynadaı krıterııler boıynsha toltyrady: bıznes-ıdeıanyń básekege qabilettiligi, ótkizý naryqtarynyń pysyqtalýy, bıznes-jobanyń qarjylyq ómirsheńdigi, kásipkerlik daǵdylardyń deńgeıi, jańa jumys oryndaryn qurý.
Osylaısha, grant berý týraly sheshim komıssııalyq jáne úmitkerlerdiń bıznes-jobalarynyń pysyqtalýyn baǵalaýdyń naqty krıterııleri negizinde qabyldanady.
Komıssııanyń sheshimi úmitkerdiń Business.enbek.kz portalyndaǵy jeke kabınetine jiberiledi. Komıssııa oń sheshim qabyldaǵan jaǵdaıda úmitker banktik derektemelerdi usynady, shartqa qol qoıady jáne odan ári toqsan saıyn bólingen qarajattyń paıdalanylýy týraly esepterdi usynady. Munyń bári halyqty jumyspen qamtý ortalyqtaryna barmaı-aq, elektrondyq formatta jasalady.
Grant alý úshin ótinishterdi qabyldaý lekter boıynsha júzege asyrylady. Kelesi lek osy jyldyń qyrkúıek aıynda bolady dep kútilýde. Bul QR Áleýmettik kodeksin iske asyrý sheńberinde oblystar men megapolıster deńgeıinde 20 eńbek mobıldiligi ortalyǵyn qurýǵa jáne 2023 jylǵy shildede qazirgi halyqty jumyspen qamtý ortalyqtaryn olardyń fılıaldary retinde qaıta qurylýyna baılanysty bolyp otyr.
Grant alýǵa ótinishterdi qabyldaýdy bastaý týraly habarlandyrý QR Eńbek jáne halyqty áleýmettik qorǵaý mınıstrliginiń jáne halyqty jumyspen qamtý máseleleri jónindegi organdardyń resmı ınternet-resýrsynda ótinishterdi qabyldaýdan 10 kúntizbelik kún buryn jarııalanatynyn atap ótý qajet. Business.enbek.kz portalynda ótinishterdi qabyldaý merzimi ár lekte 10 (on) jumys kúnin quraıdy.