5,2 mln gektar aýyl sharýashylyǵy jeri memlekettik menshikke qaıtaryldy

ASTANA. QazAqparat – Bıyl 5,2 mln gektar aýyl sharýashylyǵy jerleri memlekettik menshikke qaıtaryldy. Bul týraly QR Úkimetiniń keńeıtilgen otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Aýyl sharýashylyǵynda bıyl 21 mln tonna astyq jınaldy. Bul sońǵy 10 jyldaǵy eń joǵary kórsetkishteriniń biri. Kóktemgi egis jáne egin jınaý jumystaryna jeńildikpen nesıe berý kólemi 2 esege ulǵaıtyldy. 420 myń tonna jeńildikti janar-jaǵarmaı bólindi. Aýyl sharýashylyǵy tehnıkasyna jeńildikpen nesıe berý kólemi 145 mlrd teńgege deıin ulǵaıtyldy. 5,2 mln gektar aýyl sharýashylyǵy jerleri memlekettik menshikke qaıtaryldy. Kelesi jyly qosymsha 5 mln gektardy qaıtarý josparlanýda», - dedi Úkimet basshysy.

Álıhan Smaıylovtyń atap ótýinshe, qazirgi ýaqytta agroónerkásiptik keshendi sýbsıdııalaý júıesin reformalaýdyń nusqasy ázirlendi. Barlyq ózgerister fermerler qaýymdastyǵymen talqylandy. Sýbsıdııalaýdyń memlekettik ashyq aqparattyq júıesi engizildi.

«Shaǵyn nesıeleý esebinen aýyl halqynyń tabysyn arttyrý jónindegi jobany iske asyrý bastaldy. Oǵan kelesi jylǵa ázirshe 70 mlrd teńge bólindi. 5 jyldyń ishinde osy jobaǵa 1 trln teńge baǵyttaý josparlanyp otyr. Nátıjesinde, 1 mln-nan astam aýyl turǵyndary qamtylady. Kooperatıvtik kásipkerlikke barlyq jeke úı sharýashylyqtyń jartysy tartylady. 350 myńnan astam jańa jumys orny qurylady», - dedi Premer-Mınıstr.