«5-10-20» pılottyq jobasy bıyl júzege asyrylady

NUR-SULTAN. QazAqparat - Ulttyq bank «5-10-20» baǵdarlamasyn iske asyrý úshin «Báıterek» AQ-ǵa qosymsha 210 mlrd teńge bólmek. Bul týraly Ortalyq kommýnıkatsııalar qyzmetinde ótken onlaın brıfıngide aıtyldy, dep habarlaıdy QazAqparat tilshisi.

«Memleket basshysynyń tapsyrysymen «Nurly jer» memlekettik baǵdarlamasyn júzege asyrý úshin 390 mlrd teńge qosymsha qarjy kózdelip otyr. Onyń 180 mlrd teńgesin Ulttyq bank «Báıterek» aktsıonerlik qoǵamyna beredi. Turǵyn úı qurylysy bastalyp ketti. Jyl sońyna deıin 180 mlrd teńgeniń qurylysy tolyǵymen bitedi dep josparlap otyrmyz», - deıdi QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaev.

Onyń aıtýynsha, Ulttyq bank «Báıterek» AQ-ǵa qosymsha 210 mlrd teńge bóledi.

«Ol Memleket basshysynyń tapsyrmasy boıynsha «5-10-20» pılottyq baǵdarlamasyn júzege asyrýǵa baǵyttalyp otyr. Bul - qaıtarymy bar aqsha. Ulttyq bank «Báıterek» AQ-na 4%-ben berip otyr. Sol sebepten Turǵyn úı jınaq banki úleskerlerine 5%-dan beriletin bolady. Pılottyq joba bıyl iske asyrylady», - deıdi ol.