«5-10-20»: Páter izdeýge beriletin merzim uzartylady
NUR-SULTAN. QazAqparat - «5-10-20» baǵdarlamasy aıasynda bankte nesıesi maquldanǵan azamatqa páter izdep tabýǵa beriletin ýaqyt 6 aıǵa deıin uzartylady. Bul týraly «Qazaqstannyń turǵyn úı qurylys jınaq banki» AQ Ortalyq fılıalynyń dırektory Jansultan Mataev aıtty, dep habarlaıdy QazAqparat tilshisi.
Ortalyq kommýnıkatsııalar qyzmetindegi baspasóz máslıhatynda BAQ ókilderi «7-10-20» baǵdarlamasy arqyly bankten nesıesi maquldanǵan azamatqa páter tabýǵa eki aı ýaqyt beriletindigin ári bul merzimniń jetkiliksiz ekendigin aıtqan edi.
Osy máselege oraı jaýap bergen Jansultan Mataev atalǵan merzimdi uzartý máselesi pysyqtalyp jatqanyn aıtty.
«Iá, búgingi tańda erejege sáıkes 2 aı ýaqyt beriledi. Ony jetkiliksiz deýshilermen kelisemiz. Qazir banktiń nesıelik komıtetinde páter tabýǵa beriletin merzimdi sozý, ıaǵnı 2 aıdan 6 aıǵa deıin uzartý máselesi qarastyrylyp jatyr. Bizge de osy máselege qatysty klıentterden kóptegen saýal túsip jatyr. Jaqyn arada sheshimimizdi habarlaımyz», - dedi ol.
