4 mlrd dollarlyq daý: Kalıfornııa Tramp ákimshiligin sotqa berdi
VAShINGTON. KAZINFORM — Kalıfornııanyń Joǵary jyldamdyqty temirjol basqarmasy San-Frantsısko men Los-Andjeles arasyndaǵy joǵary jyldamdyqty temirjol (JJM) jobasyn qarjylandyrýdan bas tartqany úshin Donald Tramp ákimshiligin sotqa berdi. Bul týraly Reuters agenttigi habarlady, dep jazady TASS.
Aıtylyp otyrǵan qarajat kólemi — federaldy bıýdjetten bólinýi tıis 4 mıllıard dollar. Jobaǵa jetekshilik etetin mekeme atalǵan sheshimdi «qyzmet babyn orynsyz ári negizsiz paıdalanǵan» dep baǵalap, AQSh-tyń Los-Andjelestegi okrýgtik sotyna shaǵym túsirdi.
Kalıfornııa gýbernatory Gevın Nıýsomnyń aıtýynsha, AQSh Kólik mınıstrliginiń bul sheshimi Beıkersfıld pen Mersed arasyndaǵy alǵashqy ýchaskede temirjol tóseýge daıyndyq qyzý júrip jatqan sátte qabyldanǵan. Nıýsom federaldyq qarjylandyrýdy toqtatýdy «Prezıdent Tramptyń Kalıfornııa men joǵary jyldamdyqty temirjol jobasyna degen jeke antıpatııasynan týyndaǵan usaq saıası kek» dep atap, muny naqty derekterge emes, sýbektıvti kózqarasqa negizdelgen sheshim dep baǵalady.
Buǵan deıin Aq úı basshysy 2008 jyly sol kezdegi Kalıfornııa gýbernatory Arnold Shvartsnegger bastamashy bolǵan jobanyń federaldyq qarjylandyrýyn toqtatatynyn málimdegen. Ol jobanyń quny shekten tys ósip, iske asyrylý merzimi uzaqqa sozylǵanyn synǵa alǵan bolatyn.
— Salyq tólep júrgen eńbekqor amerıkalyqtar úshin qýana habarlaımyn: men bul shekten tys qymbatqa túsken, Kalıfornııanyń «eshqaıda aparmaıtyn joǵary jyldamdyqty poıyzynan» resmı túrde bas tartamyn, — degen edi Tramp.
Sonymen birge, ol AQSh-tyń kólik mınıstri Shon Daffıdiń arqasynda federaldyq bıýdjetten bul «alaıaq jobaǵa» endi bir tıyn da bólinbeıtinin aıtty.
Óz kezeginde Kólik mınıstrliginiń basshysy Tramp ákimshiligi JJM jobasyn toqtatýǵa baılanysty kez kelgen shaǵymǵa laıyqty jaýap qaıtaratynyna senimdi ekenin bildirdi.
Qazirgi tańda jobanyń aıasynda shamamen 50 ınfraqurylym nysany — kópirler men jol aıryqtary salynǵan. Jalpy temirjol jelisiniń uzyndyǵy 1 249 km bolýy tıis. Joba aıasynda poıyzdar saǵatyna 350 km-den astam jyldamdyqpen qatynaıdy dep josparlanǵan.
Aıta keteıik, buǵan deıin AQSh úkimeti halyqaralyq kómek pen BAQ-qa bólinetin qarjyny qysqartatynyn jazdyq.