4D tehnologııasynyń kómegimen jańa jobalar jasaǵym keledi - Evgenıı Demıdenko

QYZYLORDA. QazAqparat - Qyzylordalyq oqýshy Evgenıı Demıdenko aldaǵy ýaqytta elimizdiń jastary jańa tehnologııalardy meńgerýge umtylýy qajet dep sanaıdy, dep habarlaıdy QazAqparat tilshisi.

Evgenıı Demıdenko Qyzylorda qalasyndaǵy №2 «Murager» mektebinde bilim alady. Ol halyqaralyq jáne respýblıkalyq jarystarda joǵary oryndardan kórinip keledi. Jas óren Qyzylordada ótken «HACK DAY-2017» ıdeıalar festıvalinde óz jobalaryn usynyp, mamandar tarapynan joǵary baǵasyn aldy. Jańa tehnologııa salasyn meńgerýge jany jaqyn Evgenıı keleshekte osy baǵytta mamandyq alýdy josparlap otyr. Qazaq tilinde múdirmeı sóıleıtin jas óren qoǵamdyq sharalarǵa da belsene qatysady.

«Memleket basshysy jastarmen júzdesý barysynda kóptegen ıdeıalar aıtyldy. Elbasy Jastar jylynyń ashylýyna baılanysty saltanatty sharada.

qazirgi ekonomıkadaǵy básekelestik jańa tehnlogııany oılap taýyp, onyń tájirıbede keńinen qoldanylýyna baılanysty ekenine toqtaldy. Búgingi kúnniń bet-beınesin baqylap kórseńiz, álemde tehnologııa salasy qaryshtap damyp keledi. Aqyl-oıdyń jemisin kórip júrgen qanshama memleket bar. Bizdiń elimizdiń jastary da osyndaı jańashyl joba, ıgi bastama men sony serpiliske nazar aýdarýymyz tıis. Búginde bul baǵytta elimizde oń betburys jasalyp keledi. Jastar arasynda jańa tehnologııa salasynda óz órnegin qalyptastyryp úlgergen órender barshylyq. Álemde jańa jobalary arqyly atyn shyǵaryp, sol arqyly tolaǵaı tabystarǵa kenelgen tuǵyrly tulǵalar bar. Olardyń qatarynda Mark Tsýkerberg, Bıll Geıts, Stıv Djobs syndy jańa kózqarastaǵy azamattar sanalady. Qazir álemniń damyǵan elderinde osy maqsatta tájirıbeli qanshama maman ýaqytpen sanaspaı eńbek etip keledi. Bizdiń ómirimizge enip jatqan árbir jańalyq - osyndaı aqyl-oıdyń jemisi. Keleshekte mundaı uly kóshke bizdiń elimizdiń de ulandary qosylady degen senimdemin», - dedi Evgenıı Demıdenko QazAqparat tilshisine.

Evgenıı segizinshi synyptan bastap anımatsııa salasyna qyzyǵýshylyq bildirip keledi. Alǵashqyda qarapaıym anımatsııa túrinen bastaǵan ol qazir osy baǵytta kóptegen joba jasaıdy.

«Mektepte ınformatıka, bıologııa jáne geografııa pánderinen ótken sharalarǵa belsendi qatysamyn. Bos ýaqytymda 4D baǵdarlamasyn meńgerýge arnadym. Osy oraıda maǵan qoldaý bildirgen ata-anama, ǵylymı jetekshime, ustazdaryma alǵys bildirgim keledi. Men keleshekte «Dısneı» sekildi iri kompanııa quryp, 3D-4D anımatsııalyq tehnologııalar kómegimen jańa ıdeıalardy júzege asyrýdy maqsat tutamyn», - dedi Evgenıı Demıdenko.