497 375 teńge aıyppul: Aqmolada gaz quıý stantsııasy metrologııalyq talaptardy buzǵan
ASTANA. KAZINFORM — QR Saýda jáne ıntegratsııa mınıstrliginiń Tehnıkalyq retteý jáne metrologııa komıtetiniń Aqmola oblysy boıynsha departamenti «QazGaz Corporation» JShS gaz quıý stantsııasyn ákimshilik jaýapkershilikke tartty.
— Memlekettik ınspektorlardyń jospardan tys saparyna shyǵarylatyn avtomobıl otyny kóleminiń durystyǵyna kúmán keltirgen azamattardyń resmı ótinishteri sebep boldy. Tekserý barysynda avtomobılderge suıytylǵan gaz quıýǵa arnalǵan qondyrǵylardyń biri óreskel buzýshylyqtarmen jumys istegeni anyqtaldy, — delingen habarlamada.
Atap aıtqanda, atalǵan jabdyq Qazaqstan Respýblıkasynyń ólshem birligin qamtamasyz etýdiń memlekettik júıesiniń tiziliminde bolmaǵan jáne mindetti metrologııalyq tekserýden ótpeı qoldanylǵan.
— Bul fakt «Ólshem birligin qamtamasyz etý týraly» Qazaqstan Respýblıkasy Zańynyń talaptaryn tikeleı buzý bolyp sanalady, bul tutynýshylarǵa jiberiletin otyn kóleminiń dáldigine negizdelgen kúmán týdyrady. Anyqtalǵan quqyq buzýshylyq faktisi boıynsha «QazGaz Corporation» JShS-ne qatysty ákimshilik yqpal etý sharalary qabyldandy, — dep habarlady vedomstvodan.
Qazaqstan Respýblıkasy Ákimshilik quqyq buzýshylyq týraly Kodeksiniń 419-babyna sáıkes qysqartylǵan tártippen 497 375 teńge mólsherinde ákimshilik aıyppul salyndy. Budan basqa, metrologııalyq tekserýden ótpegen qondyrǵyny paıdalanýǵa tyıym salýdy belgileı otyryp, buzýshylyqtardy joıý týraly oryndalýy mindetti nusqama berildi.
Búgingi kúni uıǵarym tolyq kólemde oryndaldy, kásiporyn qajetti metrologııalyq rásimder júrgizdi jáne jabdyq resmı túrde paıdalanýǵa berildi. QR SIM Tehnıkalyq retteý jáne metrologııa komıteti eske salady: eger janarmaıdyń «kem quıý» faktileri anyqtalsa, nemese ólsheý quraldarynyń (tarazylar, baǵandar, eseptegishter) aqaýlyǵy týraly kúdik týyndasa, azamattar aýmaqtyq departamentke resmı ótinish jibere alady. Árbir osyndaı ótinish jospardan tys tekserý júrgizý jáne buzýshylyqtardyń jolyn kesý úshin zańdy negiz .
