496 mlrd teńgelik jol qurylysy: Bektenov Aqtóbe – Ulǵaısyn baǵytyn tekserdi
ASTANA. KAZINFORM — Aqtóbe oblysynda uzyndyǵy 262 shaqyrym bolatyn «Aqtóbe – Qarabutaq – Ulǵaısyn» avtojolyn rekonstrýktsııalaý jumystary júrip jatyr. Jobanyń quny 496,3 mlrd teńge. Premer-mınıstr Oljas Bektenov qurylys sapasy men jumystyń belgilengen merzimde aıaqtalýyn baqylaýdy kúsheıtýdi tapsyrdy. Bul týraly Úkimet málim etti.
Uzyndyǵy 262 shaqyrymdy quraıtyn joba Memleket basshysynyń «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýynda aıqyndalǵan kólik-logıstıka ınfraqurylymyn damytý jáne elimizdiń tranzıttik áleýetin nyǵaıtý jónindegi tapsyrmalaryn oryndaý aıasynda júzege asyrylyp jatyr.
«QazAvtoJol» UK» AQ basqarma tóraǵasy Darhan Imanashevtiń málimetinshe, qazirgi tańda joldyń 28 shaqyrymynda qurylys jumystary tolyq aıaqtalyp, paıdalanýǵa berilgen. Jobanyń jalpy quny – 496,3 mlrd teńge. Nysannyń paıdalanýǵa berilýi joldyń ótkizý qabiletin arttyryp, qozǵalys qaýipsizdigin qamtamasyz etýge, júk pen jolaýshy tasymalyna ketetin ýaqytty qysqartýǵa, sondaı-aq óńirdiń tranzıttik áleýetin nyǵaıtýǵa múmkindik beredi.
Aqtóbe oblysy ákiminiń orynbasary Asylbek Esenbaev jergilikti mańyzy bar avtomobıl joldaryn damytý jáne jóndeý baǵytynda atqarylyp jatqan jumystar, sondaı-aq jol jumystary men paıdalanylatyn materıaldardyń sapasyn jaqsartý boıynsha qabyldanyp jatqan sharalar týraly baıandady. 2024 jyly aımaqta aýqymdy jol qurylysy jumystary bastaldy. 2024–2026 jyldary osy maqsattarǵa 109 mlrd teńge bólinip, jergilikti mańyzy bar 956 shaqyrym jol jóndeýden ótti.
Jol qurylysy jumystary men paıdalanylatyn materıaldardyń sapasyna, sondaı-aq aýyr júk kólikteriniń qozǵalysyn baqylaýǵa erekshe nazar aýdaryldy. 2026 jyldyń 10 aıynda 1,2 myńnan astam jol-qurylys materıaly synamasynyń 11%-y belgilengen talaptarǵa sáıkes kelmegen. Premer-mınıstrge jol jabynyn saqtaý úshin salmaqtyq baqylaý kúsheıtilgeni baıandaldy. Atap aıtqanda, osy kezeńde shamamen 4,3 myń zańbuzýshylyq anyqtalǵan. Bul ótken jyldyń sáıkes kezeńimen salystyrǵanda 20%-ǵa artyq.
Jalpy, oblys boıynsha uzyndyǵy 1,8 myń shaqyrymnan asatyn avtomobıl joldaryn salý, rekonstrýktsııalaý jáne jóndeý jobalary júzege asyrylýda. Onyń ishinde 865 shaqyrym jol rekonstrýktsııalaýǵa, shamamen 293,5 shaqyrymy kúrdeli jáne ortasha jóndeýge tıesili. Іri jobalar qatarynda uzyndyǵy 262 shaqyrym bolatyn «Aqtóbe – Ulǵaısyn», 41 shaqyrymdyq «Ortalyq – Batys» (Astana – Yrǵyz), 245 shaqyrymdyq «Beıneý – Sekseýil» jáne 215 shaqyrymdyq «Ulǵaısyn – Sekseýil» avtojoldary bar. Atalǵan jobalardy 2029 jylǵa deıin aıaqtaý josparlanǵan. Sonymen qatar «Aqtóbe – Orynbor», «Aqtóbe – Orsk», «Samara – Shymkent» jáne «Qarabutaq – Qostanaı» baǵyttaryndaǵy joldardy jóndeý jumystary jalǵasýda. Qazirgi tańda oblystaǵy joldardyń normatıvtik talaptarǵa saı jaǵdaıdaǵy úlesi 78%-dan 84%-ǵa deıin ósken. 2029 jylǵa deıin taǵy 1,5 myń shaqyrym joldy jóndep, normatıvtik jaǵdaıdaǵy joldardyń úlesin 95%-ǵa jetkizý kózdelip otyr.
Premer-mınıstr avtomobıl jolyn rekonstrýktsııalaý jumystarynyń belgilengen merzimde aıaqtalýyn qamtamasyz etýdi, qurylys jumystary men qoldanylatyn materıaldardyń sapasyna, sondaı-aq bıýdjet qarajatynyń tıimdi jumsalýyna baqylaýdy kúsheıtýdi tapsyrdy. Jol qozǵalysy qaýipsizdigin qamtamasyz etý, jol boıyndaǵy ınfraqurylymdy ýaqtyly retke keltirip, jol qozǵalysyna qatysýshylarǵa qolaıly jaǵdaı jasaý máselelerine basa mán berildi. Jobany bekitilgen kestege sáıkes aıaqtaý úshin jaýapty memlekettik organdar men merdiger uıymdardyń jumysyn úılestirý qajettigi atap ótildi.