49 mln bereshek: SQO-daǵy kásiporynda 93 jumysshy eki aı jalaqy almaǵan
ASTANA. KAZINFORM — 2026 jyldyń alǵashqy 9 aıynyń qorytyndysy boıynsha Qazaqstanda memlekettik eńbek ınspektorlarynyń jumysynyń arqasynda 56 myńnan astam jumysshynyń eńbek quqyǵy qorǵaldy, dep habarlaıdy Eńbek jáne halyqty áleýmettik qorǵaý mınıstrliniń baspasóz qyzmeti.
2026 jylǵy 1 qazandaǵy jaǵdaı boıynsha memlekettik eńbek ınspektorlary eńbek zańnamasynyń saqtalýyna qatysty 5,7 myńnan astam tekserý júrgizgen. Tekserý nátıjesinde jumys berýshilerge anyqtalǵan zańbuzýshylyqtardy joıý týraly nusqamalar berilip, qyzmetkerlerdiń buzylǵan quqyqtaryn qalpyna keltirý sharalary qabyldanǵan.
Eńbekaqynyń ýaqytyly ári tolyq tólenýine erekshe kóńil bólinedi. Tekserý barysynda birqatar kásiporynda jalaqy boıynsha bereshek bary anyqtalǵan. Bul máseleni sheshý úshin jumys berýshilermen birlesip, bereshekti óteý kesteleri bekitilgen. Onyń oryndalýyn memlekettik eńbek ınspektorlary turaqty baqylaýda ustap otyr.
Qabyldanǵan sharalardyń nátıjesinde jumys berýshiler jalaqy boıynsha bereshekti óteı bastaǵan. Sonyń arqasynda júzdegen jumysshynyń eńbek quqyǵy qalpyna keltirildi.
— Máselen, Soltústik Qazaqstan oblysynda «Moskvoretskoe» JShS-niń 93 jumysshysyna eki aı boıy jalaqy tólenbegen. Osy jaǵdaıǵa baılanysty Memlekettik eńbek ınspektsııasy departamenti jospardan tys tekserý júrgizgen. Tekserý barysynda qyrkúıek-qazan aılary úshin 48,8 mln teńge kóleminde jalaqy bereshegi bary anyqtalǵan. Tekserý qorytyndysy boıynsha jumys berýshige bereshekti óteý týraly nusqama berilip, ákimshilik aıyppul salynǵan, — delingen vedomstvo habarlamasynda.
Mınıstrlik eńbek zańnamasynyń saqtalýyn qamtamasyz etý baǵytyndaǵy júıeli jumysyn jalǵastyryp keledi.
Buǵan deıin Aqtóbede qaı sala mamandarynyń jalaqysy joǵary ekenin jazdyq.
