49 áleýmettik qyzmettiń 45‑i elektrondyq formatqa kóshirildi – vıtse-mınıstr

ASTANA. KAZINFORM – Bıyl 1 tamyzǵa deıin kórsetilgen 4,2 mln áleýmettik-memlekettik qyzmettiń 2,8 mıllıony elektrondyq formatta, onyń ishinde 1,2 mıllıony proaktıvti túrde usynyldy.

- Qazir bizdiń vedomstvoǵa qarasty 49 memlekettik qyzmettiń 45‑i elektrondyq formatta al 28 qyzmet boıynsha proaktıvti formatta kórsetiledi. Bıyl 1 tamyzǵa deıin kórsetilgen 4,2 mln qyzmettiń 2,8 mıllıony elektrondyq formatta, onyń ishinde 1,2 mıllıony proaktıvti túrde usynyldy. Áleýmettik‑eńbek salasynda kórsetiletin qyzmet úderisin damytýdy úzdiksiz jalǵastyramyz, - dedi Eńbek jáne halyqty áleýmettik qorǵaý vıtse-mınıstri Oljas Anafın ortalyq kommýnıkatsııalar qyzmeti alańynda ótken baspasóz máslıhatynda.

Sondaı-aq vıtse-mınıstr bıyl birinshi jartyjyldyqta 2 jańa qyzmettiń avtomattandyrylǵanyn aıtty. Birinshi - eresek, áreketi shekteýli azamattardy qadaǵalaý nemese qamqor bolý, ekinshi – atalǵan sanatqa jatatyn azamattardyń múlki men tólemin basqarýǵa ruqsat berý.

- Ázirge bul qyzmet shamamen 1,4 myńǵa jýyq ret kórsetildi. Sonymen qatar eGov mobile qosymshasynda «Qamqorshylyq ornatý týraly málimet» jańa tsıfrlyq qujaty paıda boldy. Jalpy, atalǵan qosymsha arqyly áleýmettik‑eńbek salacyndaǵy 35 qyzmet pen 8 tsıfrlyq qujatty alýǵa bolady, - deıdi ol.

Eske sala keteıik, endi memlekettik qoldaý kórsetkende kómekke muqtaj azamattyń beıresmı tabysy da esepke alynady. 

Odan bólek, Eńbek mınıstrligi azamattardyń múgedektigin jasandy ıntellektiniń kómegimen anyqtap, sol sııaqty ataýly áleýmettik kómekti taǵaıyndaýda jasandy ıntellektige júginbek.