48 myńnan astam adam «JJK-2020» baǵdarlamasy boıynsha oqytýdan ótti - Q. Ábsattarov

ASTANA. 3 jeltoqsan. QazAqparat - 48 myńnan astam adam «Jumyspen qamtýdyń jol kartasy - 2020» baǵdarlamasynyń úshinshi baǵyty aıasynda oqytýdan ótip jatyr, dep habarlady Eńbek jáne halyqty áleýmettik qorǵaý vıtse-mınıstri Qaırat Ábsattarov Primeminister.kz saıtyna bergen suhbatynda.

«Baǵdarlamanyń úshinshi baǵyty boıynsha kásibı oqytýmen 48 280 adam qamtyldy», - dedi Q. Ábsattarov.
Onyń aıtýynsha, baǵdarlamanyń úshinshi baǵytyna qatysýǵa basymdyqty quqyqqa aýyl jastary, jetimder úıiniń tárbıelenýshileri, jetim balalar jáne ata-ana qamqorlyǵynsyz qalǵan balalar ıe.

«Azamattardyń baǵdarlamanyń bul baǵytyna qatysýy jumyssyzdar qataryn tolyqtyrýdyń ornyna jumysqa turýdyń múmkindikterin arttyrady. Oǵan qosa, olar jańa mamandyqty tegin ıgerip, biliktilikterin arttyrady, stıpendııa tóleý jáne sýbsıdııa usynýmen kásibı daıarlaýdan ótedi», - dep atap ótti vıtse-mınıstr.

Barlyǵy baǵdarlamany júzege asyrýdyń basynan bastap 110 myńǵa jýyq qazaqstandyq qamtylǵan. Ol atap ótkendeı, jas mamandarǵa «Jastar is-tájirıbesi» baǵdarlamasy arnalǵan, ol túlekterdiń alǵan mamandyqtary boıynsha memleket esebinen eńbekaqysyn jartylaı tóleý arqyly jumystyń alǵashqy tájirıbesin alýdy qarastyrady.

Vıtse-mınıstr málimdegendeı, uıymdastyrylǵan áleýmettik jumys oryndaryna jumyssyz azamattar esebinen 70 myńǵa jýyq adam eńbekpen qamtylǵan.