48 myń elordalyq turǵyn úı kezeginde tur
NUR-SULTAN. QazAqparat - Ótken jyly az qamtylǵan otbasylarǵa 2900 páter berildi. Bul týraly Nur-Sultan qalasynyń ákimi Altaı Kólginov halyqqa esep berý kezdesýinde aıtty, dep habarlaıdy QazAqparat tilshisi.
«Elordada 48 myń adam turǵyn úı kezeginde tur. Onyń ishinde áleýmettik az qamtylǵan azamattar, múmkindigi shekteýli jandar, ata-ananyń qamqorlyǵynsyz qalǵan balalar, jalǵyz basty analar jáne t.b. bar. Odan bólek, Turǵyn úı qurylys jınaq bankinde qazir 214 myń salymshy óziniń esepshotyn ashqan. Ótken jyly ǵana 59 myń adam esepshot ashty. Ótken jyly az qamtylǵan otbasylarǵa 2900 páter berdik. Sonyń ishinde Prezıdenttiń tapsyrmasy boıynsha jumys isteýshi jastarǵa 1050 páter berdik. Bıyl bul kórsetkishti úsh ese kóbeıtemiz. Bıyl 10 000 páterdiń qurylysyn bastaımyz, sonyń 8 myńyn jyldyń sońyna deıin aıaqtaýdy kózdep otyrmyz», - deıdi Altaı Kólginov.
Sondaı-aq, ol qaladaǵy apattyq jaǵdaıdaǵy úılerge toqtalyp ótti.
«Jeti jyl buryn apattyq jaǵdaıdaǵy úılerdi máselesin retteý baǵdarlamasy qolǵa alynǵan. Osy ýaqyt aralyǵynda bar bolǵany 200-den astam úıdiń máselesi sheshildi. Ol úılerdiń turǵyndary jańa páterlerge kóshirildi. Endi shamamen 135 apatty jaǵdaıdaǵy úımen jumys istep jatyrmyz. Biraq 1 jyl ishinde bárin kóshirý múmkin emes. Bıyl ázirge 2 jataqhana men birneshe úıge súrý jumystary júrgiziledi, qalǵanyn jospar boıynsha kezek-kezegimen isteımiz», - deıdi ol.
