48 máslıhat depýtattary saılandy - OSK
Nátıjesinde Almaty qalalyq máslıhatynyń 2 depýtaty, 2 oblystyq, 13 qalalyq jáne 31 aýdandyq máslıhattyń depýtattary saılandy. Bul týraly búgin Ortalyq saılaý komıssııasynda ótken brıfıngte vedomstvonyń baspasóz hatshysy Venera Jeksembekova málim etti.
«Saılaý naýqany barysynda barlyǵy 159 kandıdat usynylǵan, olardyń 52-sin saıası partııalar, 107-si ózin-ózi usynǵandar. Okrýgtik saılaý komıssııalary máslıhattar depýtattyǵyna kandıdat retinde 150 adamdy tirkedi. Jalpy respýblıka boıynsha saılaý bıýlletenderine 127 kandıdattyń tegi engizildi. Bir depýtattyq mandatqa ortasha básekelestik shamamen 3 úmitkerdi qurady», - dedi V. Jeksembekova.
Onyń aıtýynsha, sharaǵa saılaýshylardyń kelýi 72,3 %-dy qurady. Daýys berý barysy men daýystardy sanaý rásimin 380 kandıdattyń senim bildirgen adamdary, saıası partııalar, qoǵamdyq birlestikter jáne BAQ ókilderi baıqaýdy júzege asyrǵan. Máslıhattardyń saılanǵan depýtattarynyń 33-i er adam jáne 15-i áıel. Saılanǵan depýtattardyń ortasha jasy - 45 jas. Olardyń 91,7 paıyzynyń joǵary, 6,2 % -nyń orta arnaıy jáne 2,1%-nyń orta bilimi bar. 56,3%-y memlekettik mekemelerde, uıymdarda jáne kásiporyndarda, 22,9%-y kommertsııalyq qurylymdarda jumys jasaıdy, 16,7%-y saıası partııalar men ÚEU qyzmetkerleri. «Jalpy saılaý naýqany saılaý zańnamasynyń talaptaryna sáıkes ótti. Ortsaılaýkomǵa 3 ótinish kelip tústi. Olar saılaý zańnamasynyń jekelengen normalaryn túsindirýdi talap etti. Barlyq ótinishter ýaqtyly qaralyp, olar boıynsha tıisti jaýaptar men túsindirmeler berildi», - deıdi V. Jeksembekova.
