48 áskerı qyzmetshi merziminen buryn áskerı ataq aldy
ASTANA. KAZINFORM – Astanada Ulttyq áskerı-patrıottyq ortalyqta Otan qorǵaýshylar kúnine arnalǵan saltanatty jıyn ótti. Onda Qarýly Kúshterdiń áskerı qyzmetshileri memlekettik jáne vedomstvolyq nagradalarmen marapattaldy.
Іs-sharaǵa Qorǵanys mınıstrliginiń, Bas shtabtyń, Qarýly kúshterdiń basshylyǵy, Aqmola óńirlik garnızonynyń áskerı qyzmetshileri, ardagerler, merzimdi qyzmet sarbazdary jáne «Jas sarbaz» balalar-jasóspirimder qozǵalysynyń tárbıelenýshileri qatysty.
Jeke quramdy memlekettik merekemen Qorǵanys mınıstri avıatsııa general-leıtenanty Dáýren Qosanov quttyqtady.
– Jańa Konstıtýtsııanyń qabyldanýy aıasynda bul kún erekshe mańyzdy bolmaq. Onyń kirispesinde memleket damýynyń negizgi qaǵıdattary – egemendik, halyq birligi, qaýipsizdik pen turaqtylyq bekitilgen. Osyǵan baılanysty Otan qorǵaýshy kúni áskerı qyzmetshilerdiń kásibı merekesi ǵana emes, el tarıhy men qazirgi konstıtýtsııalyq qundylyqtardy biriktiretin memlekettiliktiń mańyzdy sımvoly, – dep atap ótti mınıstr.
Óz sózinde D.Qosanov mınıstrliktiń zańdy jetildirý, áskerı basqarý, áskerlerdiń jaýyngerlik ázirligin arttyrý, qarý-jaraqty jańǵyrtý, qorǵanys salasyna tsıfrlyq tehnologııalardy engizý, áskerge shaqyrý jáne áskerı qyzmet ótkerý júıesi jónindegi aýqymdy jumysyn atap ótti.
El basshylyǵy da vedomstvonyń qorǵanys qabiletin qamtamasyz etý, áskerlerdi basqarý jáne joǵary jaýyngerlik daıyndyqty qoldaý isindegi jetistikterin joǵary baǵalady.
Osylaısha, Memleket basshysynyń Jarlyǵymen joǵary ofıtserlik quramnyń «general-maıor» ataǵy Aıdos Myrzahmetovke, «avıatsııa general-maıory» ataǵy – Tımýr Espaǵanbetovke berildi.
B.Momyshuly atyndaǵy ІІ dárejeli «Aıbyn» ordenin – Qorǵanys mınıstrligi departamentiniń bastyǵy Renat Dármenov, Áýe qorǵanysy kúshteri bas qolbasshysy basqarmasy qarý-jaraq bas basqarmasynyń shtaby bastyǵy Dmıtrıı Fedorchenko, Áskerı-teńiz kúshteri bas qolbasshysynyń birinshi orynbasary Danııar Haırýshev aldy.
Raqymjan Qoshqarbaev atyndaǵy III dárejeli «Aıbyn» ordenine 10810 áskerı bóliminiń serjanty Medet Muhtarhan men Áýe qorǵanysy kúshteriniń serjanty Ǵalymjan Táýkebaev ıe boldy.
Jalpy memlekettik nagradalar Qorǵanys mınıstrliginiń 34 áskerı qyzmetshisine tabystaldy. ІІ dárejeli «Aıbyn» ordenimen – 5, ІІІ dárejeli «Aıbyn» ordenimen 2, «Qurmet» ordenimen 2 áskerı qyzmetshi marapattaldy.
«Jaýyngerlik erligi úshin» medalin 22, «Eren eńbegi úshin» medalin Qarýly Kúshterdiń 3 ókili aldy. Qorǵanys mınıstrliginiń vedomstvolyq nagradalarymen: «El qorǵany» medalimen 41 áskerı qyzmetshi, «Qazaqstan Respýblıkasy Qarýly Kúshteriniń úzdigi» tósbelgisimen 11 merzimdi qyzmetshi marapattaldy. Merziminen buryn áskerı ataqtar 48 áskerı qyzmetshige berildi.
Nagradalar tapsyrylǵannan keıin Qarýly Kúshter Ulttyq áskerı-patrıottyq ortalyǵynyń shyǵarmashylyq ujymy daıyndaǵan merekelik kontsert ótti.
Aıta keteıik, búgin Aqordada Memleket basshysy Qasym-Jomart Toqaev áskerı jáne kúshtik qurylym qyzmetkerlerine joǵary áskerı jáne arnaýly ataqtar, synyptyq shender tabys etti.
