471 uıym múgedektigi bar adamdardy jumysqa ornalastyrýǵa mindetteldi
ASTANA. KAZINFORM — Almaty oblysynyń prokýratýrasy múgedektigi bar adamdardy jumyspen qamtýǵa arnalǵan kvotalardyń oryndalýyna qatysty zań buzýshylyqtardy anyqtady.
Áleýmettik kodekstiń 107-baby 2-tarmaǵyna sáıkes, qyzmetkerleriniń sany 50 adamnan asatyn jumys berýshiler múgedektigi bar adamdarǵa arnalǵan jumys oryndarynyń kvotasyn 2%-dan 4%-ǵa deıin belgileýge tıis.
Oblysta mundaı talapqa saı keletin 471 uıym bar. Olarda kvota boıynsha keminde 963 jumys orny qarastyrylýy qajet edi. Alaıda 2026 jyly 55 uıym ǵana múgedektigi bar 97 adamdy jumysqa ornalastyrýǵa arnalǵan kvota bekitken.
Osylaısha, kóptegen adamnyń jumysqa ornalasý múmkindigi shektelgen.
Prokýratýranyń qadaǵalaý aktisinen keıin zań buzýshylyqtar joıylyp, kináli laýazymdy tulǵalar jaýapkershilikke tartyldy. Nátıjesinde múgedektigi bar adamdarǵa arnalǵan jumys oryndarynyń kvotasy 10 ese artty.
Eske salaıyq, munyń aldynda elimizde múgedektigi bar adamdarǵa arnalǵan Telegram-bot iske qosylǵanyn habarlaǵan edik.
