47 jastaǵy qyzylordalyqtyń keýdesinen 10 santımetr sym alyndy
QYZYLORDA. KAZINFORM — Qyzylorda oblystyq kópbeıindi aýrýhanasynda sol jaq keýde tusynan jansyz zatty alý boıynsha torakoskopııa otasy jasaldy.
Aýrýhananyń baspasóz qyzmeti habarlaǵandaı, 47 jastaǵy Qyzylorda turǵyny oblystyq densaýlyq saqtaý basqarmasy uıymdastyrǵan ashyq esik kúninde dáriger keńesine júgingen. Naýqas sol jaq keýde tusy aýyratynyn aıtyp shaǵymdanǵan.
— Mamandar zertteı kele onyń denesinde uzyndyǵy 10 santımetrge jetetin sym baryn anyqtady. Naýqasqa buǵan deıin basqa aýrýhanada ota jasalyp, oń jaq buǵana súıeginiń synyǵyna baılanysty metall konstrýktsııa ornatylǵan. Sol keıin jyljyp ketip, janyna batyp júripti. Kezekti ota kezinde mamandar jansyz zatty alyp tastady. Ota sátti ótti. Naýqastyń jaǵdaıy jaqsy. Tolyq em qabyldaǵasyn úıine shyǵarylady. Belgili bir ýaqytqa deıin emhana baqylaýynda bolady, — dedi aýrýhananyń baspasóz qyzmetiniń mamany Gúlbaný Maqajan.
Otany aýrýhananyń hırýrgııa-2 bóliminiń meńgerýshisi Beket Mantaev assıstenti Raýan Jálimbetovpen birge jasady. Sondaı-aq oǵan anestezıolog Ǵabıt Dúısen qatysty.
Aıta keteıik, buǵan deıin Shymkent qalalyq perınataldy ortalyǵynda salmaǵy nebári 1000 gramm, týǵanyna 45 kún bolǵan náresteniń júregine kúrdeli operatsııa jasaldy.