47 aýlany sý alǵan – tasqyn ońtústik óńirlerge de keldi

ASTANA. KAZINFORM – Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash óńirlerde tasqynmen 46 myńnan astam adam arpalysyp jatqanyn aıtty.

«Soltústik Qazaqstan oblysy Qyzyljar aýdanynyń Kýstovoe, Vagýlına, Krasnoıarka, Sokolovka, Dolmatovo aýyldarynan, Aqtóbe oblysy Yrǵyz aýdanynyń Quılys aýylynan, Batys Qazaqstan oblysy Oral qalasynyń saıajaı alaptarynan, Aqmola oblysy Jaqsy aýdanynyń Esil aýylynan, Jarqaıyń aýdanynyń Lvovskoe aýylynan, Qostanaı oblysynda Jangeldın aýdanynyń Táýish aýylynan 2 834 adam aldyn ala evakýatsııalandy, olar evakýatsııalaý pýnktterine jáne týystarynyń úılerine ornalastyryldy», - dedi ol.

TJM ókili ońtústik óńirlerde jaýyn-shashynnyń moldyǵynan tasqyn tirkelgenin atap ótti.

«Jaýyn-shashynnyń mol túsýine baılanysty Túrkistan oblysy Báıdibek aýdanynyń Aqbastaý aýylynda, Jambyl oblysy Jambyl aýdanynyń Jasórken aýylynda 47 aýla aýmaǵy sý astynda qaldy. Qumqap tósep, aryq tazartý, sý burý jumystary júrgizildi.

Avarııalyq-qutqarý jáne sý tasqynyna qarsy jumystarǵa 46 myń adam, 4 634 tehnıka, 860 sý sorý quraly, 332 júzý quraly, 17 áýe kemesi jumyldyryldy.

Tótenshe jaǵdaılar mınıstrligi azamattardy tasqyn kezinde qaýipsizdik sharalaryn saqtap, evakýatsııalaý pýnkterinen ruqsatsyz ketpeýge jáne balalardy qaraýsyz qaldyrmaýǵa shaqyrady», - dedi Erasyl Saıpash.