467 qazaqstandyq elge qaıtarylady – SІM
ASTANA. KAZINFORM – Syrtqy ister mınıstrligi quzyretti organdarmen birlesip, shıelenis aımaǵynan azamattardy shyǵarý boıynsha alǵashqy evakýatsııalyq reısterdi uıymdastyrdy.
Almaty-Masqat-Almaty baǵyty boıynsha eki reıs josparlanǵan.
Seısenbi kúni tańerteńgi ýaqytta 278 qazaqstandyq Dýbaıdaǵy QR Bas konsýldyǵynyń qyzmetkerlerimen birge Masqatqa qaraı jerústi kóligimen jolǵa shyqty. BAÁ jáne Oman shekarasynda azamattarǵa shekaralyq rásimderden jedel ótýdi qamtamasyz etý úshin konsýldyq qoldaý kórsetildi.
Keıin osy baǵyt boıynsha 189 qazaqstandyqtan turatyn ekinshi toptyń ushýy josparlanǵan. Osylaısha, jalpy sany 467 Qazaqstan azamaty elge oralady.
Áýe reısterinen bólek evakýatsııa jerústi baǵyttary arqyly da júzege asyrylyp jatyr. Atap aıtqanda, Qazaqstannyń Tegeran, Ashhabad jáne Gorgandaǵy mekemeleri Iran-Túrikmenstan shekarasyndaǵy «Inchebýrýn» ótkizý pýnkti arqyly 15 QR azamatynyń qaýipsiz ótýin qamtamasyz etti. Olarǵa ári qaraı Aqtaý qalasyna jetýine qajetti qoldaý kórsetildi.
Sondaı-aq, Tegeran jáne Erevandaǵy dıplomattar Iran aýmaǵynan «Zarkýh» kompanııasynyń 35 qyzmetkeriniń Iran-Armenııa shekarasy arqyly avtobýspen shyǵýyna járdem kórsetti.
Óńirdegi Qazaqstannyń dıplomatııalyq ókildikteri evakýatsııa tolyq aıaqtalǵanǵa deıin sol jerdegi jumysty úılestirýdi jalǵastyryp, azamattarmen turaqty baılanysta.
Aıta ketelik Kólik mınıstrligi Taıaý Shyǵystan azamattardy qaıtarý reısterin uıymdastyryp jatqany týraly jazǵan edik.