46 jastaǵy ózbek gımnasty toǵyzynshy Olımpıadasyna daıyndalyp jatyr

TAShKENT. QazAqparat – Ózbek gımnasty Oksana Chýsovıtına 2024 jyly Parıjde ótetin jazǵy Olımpıadaǵa daıyndalyp jatyr, dep habarlaıdy QazAqparat menshikti tilshisi Ózbekstan Ulttyq olımpıada komıtetiniń baspasóz qyzmetine silteme jasap.

UOK málimetinshe, aty ańyzǵa aınalǵan gımnast Ózbekstannyń bıylǵy chempıonatynda qoldy tirep sekirýden jeńiske jetip, búgingi tańda bul baǵytta oǵan teń keler eshkim joq ekenin taǵy da dáleldedi.

Naýryz aıynda ol Dohadaǵy álem kýbogynyń kezeńinde qoldy tirep sekirýden birinshi oryn aldy.

Іshki chempıonattaǵy jeńisten keıin Oksana Chýsovıtına 2024 jyly Parıjde ótetin Olımpıada oıyndaryna daıyndalýǵa sheshim qabyldady.

«Men jaqsylap oılanyp, Azııa oıyndarynan keıin Parıj-2024 Olımpıadasyna daıyndalý týraly sheshim qabyldadym», - dep málimdedi Chýsovıtına.

Aıta keteıik, maýsym aıynda 47 jasqa tolatyn Oksana Chýsovıtına Olımpıada oıyndaryna 8 ret qatysyp, gımnastıka tarıhyna jáne Gınnestiń rekordtar kitabyna engen.

Onyń júlde qorynda komandalyq kópsaıysta Barselona-1992 altyny, qoldy tirep sekirýden Beıjiń-2008 kúmisi, sondaı-aq Álem chempıonattarynda úsh altyn, kúmis jáne qola medaldar bar.

Tokıo-2020-dan keıin ol mansabyn aıaqtaıtynyn jarııalady, biraq keıinirek sportqa qaıta oraldy.

Eger ol Frantsııadaǵy tórt jyldyqtyń negizgi jarystaryna qatyssa, onda ol óziniń rekordyn jańartady.