46 jastaǵy Ronaldıno sońǵy golyn soǵý úshin kásibı fýtbolǵa qaıta oraldy
ASTANA. KAZINFORM – Brazılııa fýtbolynyń ańyzy Ronaldıno 46 jasynda alańǵa qaıta oralyp, Italııanyń «Ravenna» klýbynyń oıynshysy retinde resmı tirkeldi, dep habarlaıdy Sky Sport.
Italııalyq basylymnyń málimetinshe, Ronaldınonyń negizgi maqsaty – kásibı mansabyndaǵy sońǵy golyn soǵý. «Ravenna» onyń aldaǵy maýsymda alańǵa shyǵatynyn málimdep, brazılııalyq fýtbolshy kıetin jańa jeıdeni de tanystyrǵan.
– Jańa atmosfera, baıaǵy kúlki. Doppen qaıtadan bılep, Ignatsıo Chıprıanı jáne Chıprıanı otbasymen birge jańa ári tamasha tarıh jazýdy asyǵa kútip júrmin. Men úshin fýtbol árqashan toı bolyp keldi. Osy rýhty Ravennaǵa alyp keletinime qýanyshtymyn, – dedi Ronaldıno.
Klýbtyń habarlaýynsha, Ronaldınonyń «Ravennaǵa» qosylatyny 23 maýsymda Maıamıde resmı jarııalanǵan. Ol komanda sapyna fýtbolshy retinde tirkelgen.
«Ravenna» prezıdenti Ignatsıo Chıprıanı Ronaldınony bala kezinen kýmır tutqanyn aıtty. Onyń pikirinshe, áıgili brazılııalyqtyń klýbqa kelýi «Ravenna» úshin erekshe oqıǵa ári jańa býyn jankúıerleriniń komandaǵa qyzyǵýshylyǵyn arttyrýǵa múmkindik beredi.
Aıta keteıik, byltyr Ronaldınonyń rekordyn jańartqan Meırambek Sileýsinov esimdi oqýshy «Ordabasydan» shaqyrtý alǵanyn jazdyq.
