46 jalǵan dıplom: dıplomdar endi tek QR-kod pen biregeı nómir arqyly tekseriledi
ASTANA. KAZINFORM – Ǵylym jáne joǵary bilim mınıstrligi 1991 jyldan beri berilgen dıplomdardyń derekter bazasyn qurdy.
Qazirgi tańda ınternet keńistiginde jalǵan dıplomdar týraly túrli aqparat keńinen taralyp jatyr. Qujattardyń zańsyz aınalymynyń aldyn alý maqsatynda Ǵylym jáne joǵary bilim mınıstrligi 1991 jyldan beri berilgen dıplomdardyń derekter bazasyn qurdy.
Mınıstrlik bilim berý týraly qujattardyń ózindik úlgisiniń mazmunyna qoıylatyn negizgi talaptardy, sondaı-aq joǵary oqý oryndary túlekterine arnalǵan osyndaı qujattardyń serııalaryn bekitti.
— Dıplomdar arnaıy modýl arqyly biregeı nómirler men QR-kodtar berý jolymen qalyptastyrylady. Júıege qol jetkizý quqyǵy osy modýlde tirkelgen, resmı túrde jaýapty ýnıversıtet qyzmetkerlerine ǵana beriledi.
Dıplomdardy generatsııalaý «Joǵary bilim berýdiń biryńǵaı platformasy» (JBBP) aqparattyq júıesindegi bilim alýshylar týraly derekter negizinde júzege asyrylady. Eger bilim alýshy týraly aqparat JBBP-da bolmasa, dıplom nómirin qalyptastyrý múmkin emes.
Ózindik úlgidegi bilim týraly qujattarda generatsııalanǵan biregeı nómir men QR-kod bolmaǵan jaǵdaıda mundaı qujattar jaramsyz dep tanylady, — delingen mınıstrlik habarlamasynda.
Sonymen qatar Mádenıet jáne aqparat mınıstrligi jáne Іshki ister mınıstrligi jalǵan dıplomdardy daıyndaý jáne satý faktilerin turaqty túrde baqylap, toqtatyp otyrady. Qylmystyq kodeksiniń 385-babyna sáıkes jalǵan qujattardy jasaý nemese qoldaný aıyppul salýǵa, túzeý jumystaryna nemese eki jylǵa deıin bas bostandyǵyn shekteý ne aıyrýǵa ákep soǵady.
— Búgingi tańda 46 jalǵan dıplom jáne olardy zańsyz daıyndaýmen aınalysqan 20 ınternet-resýrs anyqtaldy. Materıaldar ІІM men MAM-ǵa joldandy, — delingen habarlamada.
Sonymen qatar joǵary oqý oryndary derekterdi tsıfrlandyrý jumysyn jalǵastyrady, al jumys berýshiler dıplomnyń túpnusqalyǵyn https://epvo.kz servısi arqyly teksere alady. Dıplomnyń elektrondyq nusqasy elektrondyq úkimettiń («Tsıfrlyq qujattar») mobıldi qosymshasynda da qoljetimdi.
Aıta ketelik sport salasynda jalǵan dıplommen nápaqy taýyp júrgen 260-tan astam adam anyqtalǵan edi.