46 myńnan astam medqyzmetker koronavırýspen kúreske jumyldyrylǵan

NUR-SULTAN. QazAqparat – Densaýlyq saqtaý júıesiniń barlyq áleýeti koronavırýs ınfektsııasymen kúresýge baǵyttalǵan. Bul týraly depýtat Turǵyn Syzdykovtyń depýtattyq saýalyna oraı QR Premer-Mınıstri Asqar Mamınnyń bergen jaýabynda aıtylǵan, dep habarlaıdy QazAqparat tilshisi.

«Epıdemııaǵa qarsy is-sharalarǵa 46 myńnan astam medıtsına qyzmetkerleri tartyldy. Engizilgen qatań shekteý sharalarynyń arqasynda KVI boıynsha epıdemıologııalyq jaǵdaı turaqtandyryldy, medıtsınalyq uıymdarǵa júkteme aıtarlyqtaı tómendedi. Qazirgi ýaqytta ınfektsııanyń táýliktik ósimi 0,07%-ǵa deıin tómendedi, naýqastardyń 95%-y saýyǵyp ketti, tósek-oryn júktemesi 12%-dy quraıdy», - dep jazdy Asqar Mamın depýtattyq saýalǵa .

Onyń aıtýynsha, Úkimet kúzgi-qysqy kezeńdegi epıdemıologııalyq jaǵdaıdy eskere otyryp, KVI tolqynyna qatysty keshendi sharalar qabyldaýda.

«Jyl sońyna deıingi jeke qorǵanys quraldarynyń qory quryldy, PTR testileý áleýeti táýligine 43 myńǵa deıin ulǵaıtyldy (qajet bolǵan jaǵdaıda kúnine 60 myńǵa deıin ulǵaıtylady). Bıylǵy qazan aıynda 3100 oryndyq 15 modýldi juqpaly aýrýlar aýrýhanasy paıdalanýǵa beriledi. Qajet bolǵan jaǵdaıda statsıonarlar qaıta beıimdelip, ınfektsııalyq tósek-oryn sany 51 myńǵa deıin keńeıedi. Medıtsınalyq kómekti ásirese aýyldarda qoljetimdi etý úshin qosymsha 100 jyljymaly medıtsınalyq keshen, 53 rentgen-apparat, 2700 ókpeni jasandy jeldetý apparaty, 64 ottegi stantsııasy satyp alynady, qarashaǵa deıin 807 jedel járdem avtomashınasy jetkiziledi», - deıdi Asqar Mamın.