4,6 mln qazaqstandyqqa 3,3 trln teńge tólengen: Eńbek mınıstrligi jarty jyldy qorytyndylady
ASTANA. KAZINFORM – Búgin Qazaqstan Respýblıkasy Eńbek jáne halyqty áleýmettik qorǵaý mınıstri Asqarbek Ertaevtyń tóraǵalyǵymen Mınıstrliktiń keńeıtilgen otyrysy ótti. Onda vedomstvonyń 2026 jyldyń birinshi jartyjyldyǵyndaǵy qyzmetiniń qorytyndylary qaralyp, jyl sońyna deıingi negizgi mindetter aıqyndaldy.
Mınıstrliktiń baspasóz qyzmetiniń habarlaýynsha, otyrysqa mınıstrlik qyzmetkerleri, ortalyq jáne jergilikti atqarýshy memlekettik organdardyń, komıtetter men vedomstvolyq baǵynysty uıymdardyń ókilderi, sondaı-aq Qoǵamdyq keńes músheleri qatysty.
Otyrysty ashqan Asqarbek Ertaev mınıstrliktiń memlekettik áleýmettik saıasatty iske asyrýdy jalǵastyryp, azamattar aldyndaǵy áleýmettik mindettemelerdiń ýaqtyly oryndalýyn qamtamasyz etip otyrǵanyn atap ótti.
-2026 jyly áleýmettik tólemderge 6,8 trln teńge qarastyrylǵan. Birinshi jartyjyldyqtyń qorytyndysy boıynsha 4,6 mln adam zeınetaqy jáne járdemaqymen qamtylyp, olarǵa 3,3 trln teńge tólendi. Bizdiń mindetimiz – áleýmettik tólemderdiń turaqtylyǵyn qamtamasyz etip, halyqty áleýmettik qoldaý sharalarynyń tıimdiligin odan ári arttyrý, – dedi mınıstr.
Otyrys barysynda halyqty jumyspen qamtýǵa járdemdesý máselelerine erekshe nazar aýdaryldy.
-Jyldyq jumyspen qamtý jospary 548 myń adamdy quraıdy. Birinshi jartyjyldyqta shamamen 250 myń adam jumysqa ornalastyryldy, bul jyldyq jospardyń 46%-yna teń. Sonymen qatar jumyspen qamtýǵa járdemdesýdiń qosymsha sharalary aıasynda 245 myńnan astam azamat qoldaý aldy. Jumys izdeýde qıyndyqtarǵa tap bolǵan azamattarǵa ataýly jumyspen qamtý sharalary arqyly qoldaý kórsetý jalǵasýda, – dedi Asqarbek Ertaev.
Azamattardyń eńbek quqyqtaryn qamtamasyz etý baǵytyndaǵy jumystardyń nátıjeleri týraly Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev baıandady.
Onyń aıtýynsha, memlekettik eńbek ınspektsııasy eńbek quqyqtaryn qorǵaý jáne áleýmettik ádilettilikti qamtamasyz etý baǵytyndaǵy qyzmetin júıeli túrde kúsheıtip keledi.
-Bıylǵy jyldyń alty aıynda memlekettik eńbek ınspektorlary 3 607 tekserý júrgizdi. Bul ótken jyldyń sáıkes kezeńimen salystyrǵanda 22,6%-ǵa kóp. Baqylaý is-sharalary barysynda eńbek zańnamasynyń 4 myńnan astam buzýshylyǵy anyqtalyp, jumys berýshilerge 2,3 myńnan astam mindetti nusqama berildi, sondaı-aq ákimshilik yqpal etý sharalary qabyldandy, – dedi Erbol Tuıaqbaev.
Aıta keteıik, osyǵan deıin Astanada eńbek zańnamasyn buzǵan 96 jumys berýshige 18 mln teńge aıyppul salyndy.
