4,6 myń bastan asty: Qazaqstanda qulan popýlıatsııasy qalaı qalpyna keltirildi

ASTANA. KAZINFORM – El aýmaǵynda qulandy qaıta jersindirý bastamasyna 70 jyl tolyp otyr. 

Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń málimetine súıensek, HH ǵasyrdyń ortasyna qaraı atalǵan jabaıy janýar el aýmaǵynan tolyqtaı joıylyp ketti, al KSRO boıynsha nebary birneshe júzdegen bas ǵana Túrikmenstandaǵy qoryqta saqtalǵan. 1953 jyly dál osy jerden Barsakelmes aralyna jeti qulan ákelinip, túrdi tabıǵatqa qaıta qaıtarý jónindegi júıeli jumys qolǵa alyndy.

- Ǵalymdar men tabıǵatty qorǵaý uıymdarynyń kópjyldyq eńbeginiń nátıjesinde Qazaqstanda qulan popýlıatsııasy sátti qalpyna keltirildi. Búginde olardyń sany 4,6 myń bastan asyp, janýarlar qaıtadan dala jáne shóleıtti ekojúıede keńinen taralyp jatyr. Qulan tabıǵı tepe-teńdikti saqtaýda mańyzdy ról atqaryp, ósimdik jamylǵysyn jańartýǵa jáne ekologııalyq turaqtylyqty saqtaýǵa yqpal etedi, - deıdi Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń tóraǵasy Danııar Turǵambaev ortalyq kommýnıkatsııalar qyzmeti alańynda ótken baspasóz máslıhatynda.

Ekologııa mınıstriligi ókiliniń aıtýynsha, janýarlardy qaıta qonystandyrý jumysy jalǵasyp jatyr.

- 2024 jyly «Іle-Balqash» rezervatyna 42 qulan jáne «Altyn Dala» rezervatyna 24 qulan kóshirildi. Bıyl kúzde «Іle-Balqashqa» taǵy 17 qulan, al «Altyn Dalaǵa» 19 qulan jetkizildi. Atalǵan sharalar jergilikti popýlıatsııanyń turaqtylyǵyn arttyrýǵa jáne janýar joıylyp ketken aımaqtardaǵy tabıǵı baılanysty qalpyna keltirýge baǵyttalǵan, - dep tolyqtyrdy spıker.

Eske sala keteıik, elimizde qulannan bólek, kerqulandar da (Prjevalskıı jylqysy) jersindirilip jatyr. 

Aıta ketsek, Qazaqstanǵa Chehııadan kerqulan ákelý 2029 jylǵa deıin jalǵasatyn boldy.