46 myń akkaýntty óshirgen kúdikti: Japonııada 15 jastaǵy jasóspirim qamaýǵa alyndy
ASTANA. KAZINFORM – Japonııada 15 jastaǵy mektep oqýshysy anıme kórsetetin strımıngtik servıstiń 46 myńnan astam paıdalanýshysynyń akkaýntyn zańsyz óshirdi degen kúdikpen qamaýǵa alyndy, dep habarlaıdy Kyodo.
Tokıo polıtsııasynyń málimetinshe, Saıtama prefektýrasynyń Tokorodzava qalasynda turatyn joǵary synyp oqýshysy Bandai Namco Filmworks kompanııasyna tıesili Bandai Channel platformasynyń júıesindegi osal tusty paıdalanyp, kompanııa jumysyna kedergi keltirdi degen kúdikke ilingen.
Tergeý nusqasyna sáıkes, jasóspirim 2025 jylǵy 4 qarashada ózi jasaǵan baǵdarlama arqyly serverge jalǵan derekter jiberip, 46 812 paıdalanýshynyń jazylymyn olardyń kelisiminsiz toqtatqan. Sonyń saldarynan servıs ýaqytsha jumysyn toqtatýǵa májbúr bolǵan.
Polıtsııanyń málimetinshe, kúdikti platformanyń qaýipsizdik júıesindegi osaldyqty anyqtap, zııandy baǵdarlamany ChatGPT kómegimen jetildirgen. Kompanııa onyń serverge qoljetimdiligin buǵattaǵanymen, ol IP mekenjaıyn birneshe ret ózgertip, shabýyldaryn jalǵastyrǵan.
Jasóspirim taǵylǵan aıyptardy moıyndap, kompanııaǵa eshqandaı ókpesi bolmaǵanyn aıtqan. Onyń sózinshe, baǵdarlamalaýdy bastaýysh mekteptiń tórtinshi synybynan bastap óz betinshe meńgergen.
Aıta keteıik, jýyrda Qarýly kúshter tarıhynda tuńǵysh ret kıberqaýipsizdik ofıtserleri túlep ushqanyn jazdyq.
Sondaı-aq Japonııanyń eń iri úsh banki kıberqaýipsizdik úshin Anthropic JI-in paıdalanady.
