4,5 mln teńge: jumys kúshi tapshy óńirlerge kóshkenderge sertıfıkat beriledi

ASTANA. KAZINFORM — Eńbek jáne halyqty áleýmettik qorǵaý mınıstri Svetlana Jaqypova Memleket basshysynyń tapsyrmalaryn iske asyrý sheńberinde azamattardyń jumys kúshi tapshylyǵy bar óńirlerge erikti túrde qonys aýdarýyn yntalandyrý sharalary týraly aıtyp berdi. 

— Erikti túrde qonys aýdarýǵa járdemdesý sheńberinde jańa qoldaý sharalary engizildi. Qonys aýdarýshylarǵa turǵyn úı satyp alý úshin ekonomıkalyq mobıldilik sertıfıkaty beriledi. Bul shamamen 4,5 mln teńge. Sońǵy úsh jylda 6 myń otbasy eńbek kúshi tapshylyǵy bar óńirlerge qonys aýdardy. Olardyń jartysynan kóbi sertıfıkat aldy. Qabyldaýshy óńirlerde jeke mobıldi súıemeldeý júıesi jumys isteıdi, — dedi Svetlana Jaqypova.

Mınıstrdiń málimdeýinshe, bıyl 6 myńnan astam adam atalǵan qyzmetti alǵan.

— Qonys aýdarýshylar úshin aýyl sharýashylyǵy maqsatynda beriletin jer ýchaskelerin konkýrstan tys tártippen alý quqyǵy, sondaı-aq materıaldyq kómekti esepke alý úshin ashyq shottardan óndirip alý úshin tyıym salýdy kózdeıtin túzetýler qabyldandy. Kóshý kezinde materıaldyq kómekke júginýdiń elektrondy formaty engizildi. Jańa mehanızm iske asyrylǵan sátten bastap, «qandas» mártebesin 13 myń etnıkalyq qazaq aldy. Budan basqa biz sheteldik jumys kúshin tartý kvotasyn tómendetý saıasatyn dáıekti túrde júrgizip kelemiz. Sońǵy 5 jylda tartylǵan sheteldik jumysshylar sany 25 myńnan 17 myńǵa deıin tómendedi. Áleýmettik ádilettilik qaǵıdatyn belgileý, ońtaılandyrý boıynsha júrgizilip jatqan barlyq jumys memleket pen qoldaýǵa muqtaj azamattar múddesi teńgerimin qamtamasyz etýge jáne kórsetiletin qyzmettiń sapasyn arttyrýǵa baǵyttalǵan, — deıdi vedomstvo basshysy.

Aıta keteıik, jumys kúshi tapshy óńirlerge 2 myńnan astam adam kóship bardy. 

Eske salaıyq, jyl basynda Qazaqstanda demografııa jáne kóshi-qon salasyn retteıtin memlekettik organ qurý usynyldy.